उत्तर प्रदेशचे माजी मंत्री आणि भारतीय जनता पक्षाचे ज्येष्ठ नेते हरिनारायण राजभर यांचे रविवारी निधन झाले, अशी माहिती त्यांच्या कुटुंबीयांनी दिली. कुटुंबियांनी दिलेल्या माहितीनुसार, श्वास घेण्यास त्रास होत असल्याची तक्रार केल्यानंतर ७६ वर्षीय राजभर यांना शनिवारी रात्री लखनऊ येथील रुग्णालयात दाखल करण्यात आले होते, जिथे त्यांनी अखेरचा श्वास घेतला.

राजभर यांच्या पश्चात त्यांची पत्नी, तीन मुलगे आणि पाच मुली असा परिवार आहे. राजभर यांचा जन्म बलिया जिल्ह्यातील उभाओन पोलीस ठाण्याच्या हद्दीतील तंगुनिया गावात झाला. त्यांनी १९९१ आणि १९९६ मध्ये सियार विधानसभा मतदारसंघातून समाजवादी पक्षाचे ज्येष्ठ नेते शारदानंद आंचल यांचा पराभव करून दोनदा आमदार म्हणून निवडणूक जिंकली.

तसेच २०१४ च्या लोकसभा निवडणुकीत ते मऊ जिल्ह्यातील घोसी लोकसभा मतदारसंघातून खासदार म्हणूनही निवडून आले होते.आमदार म्हणून आपल्या कार्यकाळात, राजभर यांनी कल्याण सिंह, राम प्रकाश गुप्ता आणि राजनाथ सिंह यांच्या नेतृत्वाखालील राज्य सरकारांमध्ये राज्यमंत्री म्हणूनही काम पाहिले. त्यांच्या निधनाने भाजपवर दु:खाचा डोंगर कोसळला असून राजकीय वर्तुळात हळहळ व्यक्त केली जात आहे,.