लष्कर ए तोयबचा कमांडर सैफुल्लाह सैफ याने एका व्हिडिओमध्ये दावा केला की, हाफिज सईद आता बांगलादेशमार्गे भारतावर हल्ला करण्याची योजना आखत आहे. हा व्हिडिओ ३० ऑक्टोबर रोजी पाकिस्तानातील खैरपूर तामिवली येथे झालेल्या रॅलीदरम्यानचा असल्याचं सांगितले जात आहे.

व्हिडिओमध्ये सैफुल्लाह सैफ स्पष्टपणे म्हणताना दिसतो की, 'हाफिज सईद निष्क्रिय बसलेला नाही. तो बांगलादेशमार्गे भारतावर हल्ला करण्याची तयारी करत आहे'. त्याने दावा केला की, त्याचे लोक पूर्व पाकिस्तान किंवा बांगलादेशमध्ये सक्रिय आहेत. तसेच भारताला प्रत्युत्तर देण्यास तयार आहेत.

सैफुल्लाहने असेही म्हटलं की, स्थानिक तरूणांना जिहादसाठी तयार करण्यासाठी आणि दहशतवादी प्रशिक्षण देण्यासाठी बांगलादेशात एका साथीदार पाठवण्यात आला आहे. त्यामुळे बांगलादेश आता भारताविरूद्ध कट रचण्यासाठी लाँचपॅड बनत असल्याचा इशारा त्याने दिला.

या व्हिडिओमध्ये सैफु्ल्लाहच्या भाषणादरम्यान, अनेक लहान मुले उपस्थित असल्याचं दिसून येत आहे. ज्यामुळे असे सूचित होते की, काही दहशतवादी संघटना त्यांचे अजेंडे पुढे नेण्यासाठी मुलांचा वापर करीत आहेत. व्हिडिओच्या आधारे, पाकिस्तानी दहशतवादी संघटना मुलांना जिहादी विचारसरणीत शिकवत असल्याचा आरोप केला जात आहे.

सैफुल्लाह यांनी त्यांच्या भाषणात पाकिस्तानी सैन्याचं कौतुक केलं आहे. त्यांनी दावा केला की, ९- १० मेच्या रात्रीनंतर पाकिस्तानने भारताला प्रत्युत्तर दिलं. त्याने आणखी एक दावा करत म्हटलं की, अमेरिका आणि बांगलादेश सध्या पाकिस्तानच्या जवळ येत आहेत. त्यांनी केलेल्या दाव्यामुळे खळबळ उडाली आहे.

हे सर्व दावे सध्या फक्त एका व्हायरल व्हिडिओवर आधारीत आहे. या गंभीर आरोपांची स्वतंत्र चौकशी केली जाईल. व्हिडिओ प्रसिद्ध झाल्यानंतर सुरक्षा आणि परराष्ट्र धोरणाशी संबंधित प्रश्न निर्माण झाले असून, भारतीय सुरक्षा यंत्रणांनी या प्रकरणाची सखोल तपासणी करावी, अशी मागणी होत आहे.