गांधीनगर : गुजरातच्या वडोदऱ्यात गेल्या आठवड्यात झालेल्या भीषण कार अपघातात ८ जण जखमी झाले. या भीषण अपघातात एका महिलेचा मृत्यू झाला. भरधाव वेगात कार चालवून ३ दुचाकींना धडक देणाऱ्या रक्षित चौरसियाचा आणखी एक प्रताप आता उजेडात आला आहे. गेल्या महिन्यात रक्षितला पोलीस स्टेशनची वारी करावी लागली होती. त्यावेळी त्याला पोलिसांनी समज दिली होती. लेखी माफीनाम्यानंतर त्याची सुटका झाली होती.

२० वर्षांचा रक्षित चौरसिया मूळचा उत्तर प्रदेशच्या वाराणसीचा रहिवासी आहे. कायद्याचं शिक्षण घेत असलेला रक्षित शिक्षणासाठी बडोद्यात राहतो. महिन्याभरापूर्वी फतेहगंजमधील एका रहिवासी इमारतीत गोंधळ घातल्यामुळे एका वकिलाने रक्षित चौरसिया आणि अन्य तरुणांविरोधात पोलीस ठाण्यात तक्रार दिली होती. त्यानंतर रक्षितसह अन्य जणांना पोलिसांनी ताब्यात घेतलं आणि सयाजीगंज पोलीस ठाण्यात नेलं होतं.

फतेहगंजमध्ये एका रहिवासी इमारतीत रक्षित आणि त्याचे मित्र पार्टीसाठी जमले होते. त्यावेळी त्यांनी मोठ्या प्रमाणात धिंगाणा घातला. त्यामुळे वैतागलेल्या एका वकिलाने त्यांना शांत राहण्यास सांगितलं. हा वकील त्याच इमारतीत राहत होता. वकिलाच्या बोलण्याकडे रक्षित आणि त्याच्या मित्रांनी दुर्लक्ष केलं. त्यांनी उलट वकिलालाच धमकावलं. याची माहिती वकिलाने पोलिसांना दिली. यानंतर पोलिसांनी सगळ्या तरुणांना पकडून पोलीस ठाण्यात नेलं. या प्रकरणात रक्षित आणि त्याच्या मित्रांनी लेखी माफी मागितली. त्यानंतर पोलिसांनी त्यांना सोडून दिलं होतं.