अहमदाबाद : गुजरातमधील (Gujrat) आनंद जिल्ह्यात एक भयंकर घटना घडली. भरधाव वेगात जाणाऱ्या कारने ऑटो रिक्षा आणि दुचाकीस्वाराला जोरदार धडक दिली. ही धडक (Accident) इतकी भीषण होती की, यामध्ये दुचाकीस्वारासह ६ जणांचा जागीच मृत्यू झाला. भरधाव वेगात कार चालवणारी व्यक्ती ही गुजरातमधील कॉंग्रेस आमदार पूनम परमार यांचा जावई असल्याचं बोललं जात आहे. (Gujrat Congress Mla Son In Law Car Accident Latest News)

याप्रकरणी अहमदाबाद पोलिसांनी कॉंग्रेस आमदाराच्या जावयावर हिट अँड रन केसची तक्रार दाखल केली आहे. मिळालेल्या माहितीनुसार, हा अपघात गुजरातमधील आनंद जिल्ह्यात घडला. कारने ज्या रिक्षाला धडक दिली. त्या रिक्षातून ४ प्रवासी प्रवास करीत होते.

रिक्षामधील चारही लोक एकाच कुटुंबातील असून आईसोबत २ मुली होत्या. ज्या भावाला राखी बांधून घरी परतत होत्या. तर बाईकवर २ जण होते. हा अपघात इतका भीषण होता की, यामध्ये ४ जणांचा घटनास्थळीच मृत्यू झाला. तर दोन जणांना रुग्णालयात नेत असताना त्यांचा मृत्यू झाला.

दरम्यान, हा अपघात कॉंग्रेस आमदार पूनम परमार यांचा जावई केतन पधियार हा जबाबदार असल्याचं पोलिसांनी म्हटलं आहे. जेव्हा हा अपघात झाला तेव्हा केतन पधियार हा दारूच्या नशेत असल्याचंही पोलिसांनी म्हटलं आहे.

याप्रकरणी पोलिसांनी भारतीय दंडसंहिता ३०४ अंतर्गंत आरोपीला अटक केली आहे. या भीषष अपघातात आतापर्यंत ६ जणांचा मृ्त्यू झाला. तर आरोपीच्या ड्रायव्हरवर रुग्णालयात उपचार सुरू आहे. या घटनेचा पुढील तपास पोलीस करीत आहेत.

Edited By - Satish Daud