जर्मनीमध्ये पँसेंजर ट्रेन रुळावरून घसरून ३ जणांचा मृत्यू झाल्याची घटना घडली आहे. तर काही जण जखमी झाले आहेत. जर्मनीच्या रेल्वे अधिकाऱ्यांनी याबाबत माहिती दिली आहे. म्यूनिखपासून १५८ किलोमीटर अंतरावर असललेल्या रीडलिंगनजवळ ही दुर्घटना घडली आहे. या अपघाताच्या कारणाचा शोध घेतला जात आहे.

रिपोर्टनुसार, ट्रेन अपघातात नेमके किती जण जखमी झाले आहेत, याची अधिकृत माहिती समोर आलेली नाही. जर्मनीतील वेळेनुसार, सायंकाळी ६ वाजून १० मिनिटाला जंगलातून जाताना ट्रेनचे दोन डबे रुळावरून घसरले. या ट्रेनमध्ये १०० जण होते.

बाडेन वुर्टेनबर्ग राज्याचे गृहमंत्री थॉमस स्ट्रोबल यांनी म्हटलं की,'या भागात भरपूर पाऊस झाला. त्यामुळे ट्रेनचा अपघात झाल्याची शक्यता व्यक्त केली जात आहे. मुसळधार पाऊस आणि भुस्खलनामुळे देखील अपघात झाल्याचं टाळता येणार नाही. या प्रकरणाचा तपास सुरु करण्यात आला आहे'.

जर्मनचे चांन्सलर फ्रेडरिक मर्ज यांनी सोशल मीडिया 'एक्स'वर पोस्ट करत घटनेवर शोक व्यक्त केला. जर्मनीची रेल्वेची संचालन कंपनी डॉयचे बान यांच्याकडून देखील घटनेतील पीडितांविषयी संवेदना व्यक्त केली आहे.