दिल्लीतील लुटियन्स जोन्सचा बंगला रिकामा करण्यासाठी 200 हून अधिक माजी लोकसभा खासदारांना नोटीस बजावण्यात आली आहे. 2024 च्या लोकसभा निवडणुकीत पराभूत झालेल्या खासदारांना ही नोटीस बजावण्यात आली आहे. नियमानुसार, एक महिन्याची मर्यादा ओलांडूनही या खासदारांनी बंगला रिकामाला केला नसल्याने त्यांना ही नोटीस बजावण्यात आली आहे, असं सांगण्यात येत आहे.

माजी खासदारांना लोकसभेच्या गृहनिर्माण समितीने आपले बंगले लवकरात लवकर रिकामे करण्यास सांगितले आहे, जेणेकरून नवीन खासदारांना या बंगल्याचे वाटप केले जाईल, अशी माहिती सूत्रांनी दिली आहे.

मिळालेल्या माहितीनुसार, माजी खासदारांना मागील लोकसभा विसर्जित झाल्यानंतर एक महिन्याच्या आत त्यांचे अधिकृत निवासस्थान रिकामे करायचे होते. मात्र ही मुदत उलटून गेली आहे, तरीही माजी खासदार बंगला सोडत नाहीत.

'टाइम्स ऑफ इंडिया' शी बोलताना एका अधिकाऱ्याने सांगितले की, "माजी खासदारांनी बंगले रिकामे न केल्यास त्यांच्याविरुद्ध कारवाई सुरू केली जाईल आणि बंगला रिकामा करण्यासाठी कारवाई पथक पाठवेल जाईल.''

दरम्यान, लोकसभेची सदन समिती खासदारांना निवासस्थानांचे वाटप करते, तर केंद्रीय गृहनिर्माण आणि नागरी व्यवहार मंत्रालयांतर्गत इस्टेट संचालनालय मंत्र्यांना बंगले वाटप करते. सूत्रांनी सांगितले की, मोदी सरकार-3.0ची शपथ घेऊन एक महिन्याहून अधिक काळ लोटला असतानाही अद्याप नवीन मंत्र्यांना बंगला देण्यात आलेला नाही.