उत्तराखंडच्या मसुरीमध्ये होम स्टेमध्ये थांबलेल्या इंजिनीअर महिलेचा संशयास्पद मृत्यू झाल्याची धक्कादायक घटना उघडकीस आली आहे. पोलिसांनी महिलेचा मृतदेह ताब्यात घेऊन चौकशीला सुरुवात केली आहे. महिलेच्या संशयास्पद मृत्यूने परिसरात खळबळ माजली आहे.

मसुरी पोलीस स्टेशनच्या हद्दीतून पोलिसांना महिलेच्या संशयास्पद मृत्यूची माहिती मिळाली. होम स्टेच्या एका खोलीत एक महिला कोणतीही हालचाल करत नसल्याची माहिती पोलिसांना मिळाली होती. ही माहिती मिळताच पोलिसांनी घटनास्थळी धाव घेतली. पोलिसांनी महिलेला रुग्णालयात दाखल केले. परंतु डॉक्टरांनी महिलेला मृत घोषित केले. पी राधा गायत्री असे मृत महिलेचे नाव आहे. ही महिला दिल्लीची असून फिरण्यासाठी नवऱ्यासोबत उत्तराखंडच्या मसुरी येथे आली होती.

पोलिसांच्या विशेष पथकाने खोलीची तपासणी केली. बेडच्या चादरीवर रक्ताचे डाग आढळले. खोलीत मद्य आणि खाद्य पदार्थ आढळले. पी. राधा यांच्या पतीने पोलिसांनी सांगितले की, आम्ही दोघांनी दारूचे अधिक सेवन केलं होतं'.

तत्पूर्वी, दोघांचं लग्न ८ नोव्हेंबर २०२५ रोजी झालं. दोघेही आयटी कंपन्यांमध्ये कार्यरत आहेत. नवरा पुण्यात कामाला आहे, तर महिला गुरुग्राम येथे कामाला होती. पोलिसांनी सांगितलं की, 'पी राधा ही पती सौम्या श्रीचरणसोबत १३ जून रोजी दिल्लीहून ऋषिकेश येथे आले होते. जोडप्याने १४ जून रोजी मुसरी येथील 'होम स्टे'मध्ये थांबले. दोघांनी रात्री दारूचं सेवन केलं. त्यानंतर दोघे रात्री ३.३० वाजता झोपी गेले.

सकाळी उठल्यानंतर पत्नीच्या नाकातून रक्त येत असल्याचे पतीने पोलिसांना सांगितले. महिलेला रुग्णालयात दाखल केल्यानंतर डॉक्टरांनी मृत घोषित केले. आता शवविच्छेदनाचा अहवाल आल्यानंतर महिलेच्या मृत्यूचे कारण समोर येणार आहे.