आगीच्या ज्वाळा, आकाशाला भिडणारे धुराचे लोट आणि एका क्षणात होत्याचं नव्हतं करणारी ही दृश्य नीट बघा. ही दृश्य एखाद्या नैसर्गिक आपत्तीची नाहीत.तर एका कर्मचाऱ्यांच्या मनात खदखदणाऱ्या रागाचा हा भडका आहे.जेव्हा एखाद्या कर्मचाऱ्याचा संयम सुटतो, तेव्हा तो कोणत्या थराला जाऊ शकतो, याचंच हे एक भीषण उदाहरण आहे.

ही आग लागलीय.एनएफआय इंडस्ट्रीजच्या तब्बल 12 लाख स्क्वेअर फूटावर पसरलेल्या विशाल गोदामात.पण ही आग लागली नव्हती, तर ती लावली गेली होती, ती कशी पाहूयात. एनएफआय इंडस्ट्रीजच्या गोदामात चमेल अब्दुलकरीम हा 29 वर्षीय तरुण काम करत होता. या कंपनीचे गोदाम कॅलिफोर्नियाच्या ओंटारिया येथे आहे.

कामाचा पुरेसा मोबदला मिळत नसल्यानं चमेल अब्दुलकरीम यानं कंपनीच्या गोदामाला आग लावली. आग लावत असतानाचा व्हिडिओ अब्दुलकरीमनं फेसबुक पेजवर शेअर केला. त्यात आरोपीचा चेहरा दिसत नसला तरी तो अब्दुलकरीम असल्याची प्राथमिक माहिती आहे. लायटरच्या मदतीनं आरोपीनं गोदामातील टॉयलेट पेपर रोलला ठिकठिकाणी आग लावली. ज्यामुळे संपूर्ण गोदामातील 1800 कोटींचा माल जळून राख झाला.

दरम्यान गोदामातील आग विझवण्यासाठी 140 हून अधिक जवानांना जीवाची बाजी लावावी लागल्याची माहिती ओंटारियो फायर डिपार्टमेंटचे डेप्युटी चीफ माईक वेडेल यांनी दिलीय. या गोदामात प्रामुख्याने किम्बर्ली-क्लार्क कंपनीचे टॉयलेट पेपर आणि डायपर्सचा साठा होता. त्यामुळे मोठ्या प्रमाणात नुकसान झालयं. त्यामुळे कमी पगारामुळे इतकं टोकाचं पाऊल उचलणाऱ्या चमेल अब्दुलकरीमला पोलिसांनी बेड्या ठोकल्या आहेत.

मात्र एका बाजूला वाढती महागाई आणि दुसऱ्या बाजूला कर्मचाऱ्यांचं शोषण, या वादातून ही ठिणगी पडल्याची चर्चा आता जगभरात रंगलीय. त्यामुळे कर्मचाऱ्यांच्या ताणतणावाचं व्यवस्थापन करणं आणि कामाचा योग्य मोबदला देण्याची जबाबादारी कंपनीची असली. तरी अब्दुलकरिमची आपला राग व्यक्त करण्याची ही पद्धत योग्य होती का? याचा विचारही व्हायला हवा.