नवी दिल्ली : निवडणूक आयोगाच्या ईव्हीएम रिमोट मशीनबाबत घेतलेल्या निर्णयासंदर्भात विरोधी पक्षाची राजधानी दिल्लीत बैठक पार पडली. राष्ट्रवादीचे अध्यक्ष शरद पवार यांच्या निवासस्थानी ही बैठक झाली. अनेक विरोधी पक्षांच्या नेत्यांनी असं म्हटले होते की इलेक्ट्रॉनिक व्होटिंग मशीन (ईव्हीएम) अचूक असली पाहिजेत आणि त्यांच्या कार्यक्षमतेबद्दल कोणतीही शंका निवडणूक आयोगाने दूर केली पाहिजे.

या बैठकीनंतर बोलाताना शरद पवार यांनी म्हटलं की, आम्ही ईव्हीएम मशीनबाबत काही प्रश्न, शंका उपस्थित केल्या आहेत. त्यांची उत्तरे निवडणूक आयोगाने दिली पाहिजेत. (Political News)

दिग्विजय सिंह यांनी म्हटलं की, ईव्हीएम संदर्भात काही आक्षेप आहेत. देशवासियांच्या मनात शंका आहे. यात गडबडी करता येऊ शकते. अनेक प्रश्न आहेत ज्याचे उत्तर निवडणूक आयोगानं द्यायला पाहिजे. आमच्या मनातील संभ्रम दूर व्हायला पाहिजे.

कपिल सिब्बल यांनी म्हटलं की, ही पहिली वेळ नाही आम्ही आमचं म्हणणं निवडणूक आयोगाकडे मांडलं आहे. ईव्हीएम मशीनचा दुरुपयोग होऊ शकतो असं आम्ही अनेकदा म्हटलंय. ईव्हीएम मशीनमध्ये जेव्हा जेव्हा तांत्रिक बिघाड होतो, तेव्हा मत भाजपला जातं, हा भ्रम राजकीय पक्षांपुरता मर्यादिल राहिलेला नाही. सर्वसामान्य जनतेलाही असं वाटू लागलं आहे. मात्र आजपर्यंत निवडणूक आयोगाने याबाबत उत्तर दिलेलं नाही.

आता आम्ही पुन्हा निवडणूक आयोगाकडे शेवटचं जाणार आहोत. आम्ही उपस्थित केलेल्या प्रश्नाची लिखित स्वरुपात उत्तरे निवडणूक आयोगाने द्यावीत. जेणेकरुन ईव्हीएमबाबत कोणताही संशय राहणार नाही. मात्र निवडणूक आयोगाने योग्य त्या पद्धतीने उत्तरे दिली नाहीत तर आणि सर्वजण पुढे काय करायचं हे ठरवू, असं कपिल सिब्बल यांनी म्हटलं.