संजय गडदे, साम टीव्ही

कथित ड्रग्स तस्कर सलीम इस्माईल डोला आणि त्याच्या आर्थिक नेटवर्कविरोधात अंमलबजावणी संचालनालयाने (ईडी) मोठी कारवाई सुरू केली आहे. मनी लॉन्ड्रिंग प्रतिबंधक कायदा (PMLA) अंतर्गत नोंदवलेल्या प्रकरणात ईडीने मंगळवारी मुंबई, सूरत, अंकलेश्वर आणि राजकोटसह एकूण 20 ठिकाणी एकाचवेळी छापेमारी केली. तपास यंत्रणांच्या माहितीनुसार, ड्रग्ज निर्मिती, अमली पदार्थांची तस्करी, हवाला व्यवहार आणि बेकायदेशीर कमाईच्या पैशांचे वैध गुंतवणुकीत रूपांतर करण्याच्या संशयित व्यवहारांचा तपास या कारवाईत केला जात आहे. सलीम डोला आणि त्याच्या सहकाऱ्यांच्या आर्थिक व्यवहारांबरोबरच मालमत्ता, गुंतवणूक आणि आंतरराष्ट्रीय आर्थिक संबंधांचीही चौकशी सुरू आहे.

काही दिवसांपूर्वी नार्कोटिक्स कंट्रोल ब्युरोने (NCB) सलीम डोलाला अटक केली होती. त्यानंतर पुढील तपासासाठी त्याला मुंबई गुन्हे शाखेकडे सोपविण्यात आले. सध्या तो न्यायालयीन कोठडीत आहे. चौकशीदरम्यान तपास यंत्रणांना आर्थिक व्यवहारांबाबत महत्त्वाची माहिती मिळाल्याचे सांगितले जात आहे. सूत्रांच्या माहितीनुसार, ड्रग्ज तस्करीतून मिळालेल्या पैशांचा वापर परदेशातील मालमत्ता खरेदी, हवाला व्यवहार आणि नेटवर्क विस्तारासाठी करण्यात आल्याचा संशय आहे. त्यामुळे ईडी मनी ट्रेलचा मागोवा घेत असून विविध आर्थिक व्यवहारांची तपासणी करत आहे.

सलीम डोलाचे नाव अंडरवर्ल्ड डॉन दाऊद इब्राहिमच्या नेटवर्कशी जोडले जात असल्याचा तपास यंत्रणांचा दावा आहे. तुर्कीमधून भारतात आणल्यानंतर 2023 मधील गाजलेल्या ड्रग्ज तस्करी प्रकरणात त्याला अटक करण्यात आली होती. या प्रकरणातील आणखी एक आरोपी फैसल जावेद शेख याच्या चौकशीतूनही तपासाला नवी दिशा मिळाली आहे. त्याने दिलेल्या माहितीनंतर तपासाचा विस्तार करण्यात आला असून अनेक संशयित आर्थिक व्यवहार आणि संबंधित व्यक्तींचा शोध घेतला जात आहे.

दरम्यान, ईडीची छापेमारी आणि तपास प्रक्रिया अद्याप सुरू असून येत्या काळात या प्रकरणात आणखी मोठे खुलासे होण्याची शक्यता तपास यंत्रणांकडून व्यक्त करण्यात येत आहे.