ओडिशाच्या कटकमध्ये दोन गटात मोठा राडा झाला. मूर्ती विसर्जनावरून दोन गटात हाणामारी झाल्याची घटना घडली. या घटनेनंतर परिसरात इंटरनेट सेवा बंद करण्यात आली आहे. दोन्ही गटातील लोकांनी परिसरातील गाड्या, दुकानांची तोडफोड केली. दुर्गा मूर्ती विसर्जनावरून दोन गट भिडल्यानंतर झालेल्या हिंसेत पोलीस अधिकारी देखील जखमी झाले.

दोन गटात राडा झाल्यानंतर परिसरात २४ तासांसाठी इंटरनेट सेवा बंद करण्यात आली आहे. इंटरनेट सेवा ही रविवारी ७ वाजेपासून ते ६ ऑक्टोबर रोजी सांयकाळी ७ वाजेपर्यंत बंद राहील. या राड्यानंतर परिसरात एकच खळबळ उडाली. दोन्ही गटातील तरुणांनी परिसरात वाहनांचं प्रचंड नुकसान केलंय. पोलिसांना परिस्थितीवर नियंत्रण मिळवण्यासाठी लाठीचार्ज करावा लागला. त्यांना अश्रूधूरांच्या नळकांड्यांचाही वापर करावा लागला.

बीजू जनता दलाने जारी केलेल्या निवेदनात म्हटलं आहे की, कटक शहरातील दोन गटात राडा झाला. ओडिशाचे माजी मुख्यमंत्री, विरोधी पक्षनेते नवीन पटनायक यांनी शहरात शांतता राखण्याचं आवाहन केलं आहे. तसेच त्यांनी शहरातील कायदा सुव्यवस्थेबाबत चिंता व्यक्त केली आहे.

सहायक अग्निशमन अधिकारी संजीव कुमार बेहरा यांनी सांगितलं की, गौरीशंकर पार्कात काही समाजकंटाकांनी ८-१० जागांवर आग लावली. आम्ही या आगीवर नियंत्रण मिळवलं. दोन्ही गटातील तरुणांनी आमच्यावर दगडफेक केली. शहरातील परिस्थितीवर नियंत्रण मिळवण्यासाठी पोलिसांचा मोठा फौजफाटा तैनात करण्यात आला.

ओडिशा सराकराने कटक शहारात २४ तासांसाठी इंटरनेट सेवा बंद केली आहे. इंटरनेट सेवा बंद झाल्याने व्हाट्सअॅप, फेसबुक, एक्स आणि कोणत्याही प्रकारच्या प्लॅटफॉर्मचा वापर करता येणार नाही. अफवा पसरू नये, यासाठी इंटरनेट सेवा बंद करण्यात आली आहे. अधिकाऱ्यांच्या म्हणण्यानुसार, शहरात अफवा पसरू नये, यासाठी इंटरनेट सेवा बंद करणे गरजेचे आहे. काही संवेदनशील भागात पोलिसांचा फौजफाटा अधिक प्रमाणात तैनात करण्यात आलाय.