वाशिंग्टन: मध्य अमेरिकेतील कोस्टा रिका देशात गुरुवारी एक भयंकर विमान अपघात झाला आहे. विमानाचे (Plane) इमर्जन्सी लँडिंग करताना विमान मध्यभागी तुटून दोन तुकडे झाले आहेत. या अपघाताचा व्हिडिओ सध्या सोशल मीडियावर व्हायरल झाला आहे. ही घटना गुरुवारी जुआन सांतामारिया आंतरराष्ट्रीय विमानतळावर घडली. या अपघातानंतर विमानतळ तात्पुरते सकाळी ६ वाजेपर्यंत बंद करण्याता आले होते. (DHL Cargo Plane)

डीएचएल (DHL) च्या मालवाहू विमानात काही यांत्रिक बिघाड झाला होता, त्यामुळे त्याचे जुआन सांता मारिया विमानतळावर आपत्कालीन लँडिंग करण्यात आले होते, यादरम्यान या विमानाचे दोन तुकडे झाले.

अपघात झालेले विमान प्रवासी विमान नसून मालवाहू विमान होते. यामुळे मोठी दुर्घटना वाचली आहे. या विमानातून मालाची वाहतुक केली जाते. कार्गो विमानात फक्त दोन क्रू मेंबर्स होते, त्यांची प्रकृती ठीक असल्याचे सांगण्यात येत आहे. वैमानिकालाही कोणतीही मोठी दुखापत झालेली नाही.

जर्मन कंपनी डीएचएल (DHL) चे पिवळ्या रंगाचे विमान खाली उतरले तेव्हा त्यातून धूर निघत होता. विमान धावपट्टीवरून घसरले आणि नंतर विमानाच्या मागील चाकाजवळ दोन तुकडे झाले, असल्याचे बोलले जात आहे.

गुरुवारी सकाळी १०.३० वाजता हा अपघात झाला. बोइंग-757 विमानाने सांता मारिया विमानतळावरून उड्डाण केले. पण तांत्रिक बिघाड झाल्यामुळे 25 मिनिटांनी ते विमान परत आले. त्यामुळे विमानाला इमर्जन्सी लँडिंग करावे लागले. अपघातानंतर सायंकाळी सहा वाजेपर्यंत विमानतळ बंद ठेवण्यात आले होते. (DHL Cargo Plane)

Edited By- Santosh Kanmuse