दिल्लीकरांसाठी आजचा दिवस अत्यंत महत्वाचा आहे. कारण, आज म्हणजेच १७ सप्टेंबर रोजी अरविंद केजरीवाल मुख्यमंत्रीपदाचा राजीनामा देणार आहेत. यासोबतच दिल्लीच्या नव्या मुख्यमंत्र्यांच्या नावांची देखील घोषण होणार आहे. त्यामुळे दिल्लीला नवे सीएम कोण मिळणार, याकडे संपूर्ण देशाचं लक्ष लागून आहे. दरम्यान, केजरीवाल यांच्या राजीनाम्यापूर्वी सकाळी 11 वाजता मुख्यमंत्र्यांच्या निवासस्थानी आम आदमी पक्षाच्या विधिमंडळ पक्षाची बैठक होणार आहे.

या बैठकीतच विधीमंडळ पक्षाच्या नेत्याची निवड करून नव्या मुख्यमंत्र्यांच्या नावावर सहमती होणार आहे. त्यानंतर केजरीवाल दुपारी 4.30 वाजता राज्यपालांकडे आपला राजीनामा सादर करतील. कथित दारू घोटाळ्यात म्हणजेच अबकारी धोरण प्रकरणात मुख्यमंत्री केजरीवाल यांना अटक झाली होती.

त्यानंतर ते तुरुंगातून जामीनावर बाहेर आले. रविवारी जामीवर सुटताच मुख्यमंत्री केजरीवाल यांनी येत्या ४८ तासांत मी राजीनामा देणार, अशी घोषणा केली होती. जोपर्यंत लोक मला 'प्रामाणिकपणाचे प्रमाणपत्र' देत नाहीत तोपर्यंत मी मुख्यमंत्र्यांच्या खुर्चीवर बसणार नाही, असेही केजरीवाल यांनी स्पष्ट केले.

त्यांच्या या घोषणेनंतर दिल्लीच्या राजकारणात मोठा भूकंप आला. दिल्लीचे पुढे मुख्यमंत्री कोण होणार? याबाबत चर्चा सुरु झाली. सुनीता केजरीवाल, आतिशी, सौरभ भारद्वाज या तिन्ही नेत्यांच्या नावांची राजकीय वर्तुळात जोरदार चर्चा झाली. मात्र, अद्यापही नव्या मुख्यमंत्र्यांच्या नावावर उघडपणे भाष्य करण्यात आलं नाही. आज हा सस्पेन्सवरून पडदा हटणार आहे. त्यामुळे दिल्लीचे नवे सीएम नेमके कोण होणार? याकडे संपूर्ण देशाचं लक्ष लागून आहे.