दिल्ली सरकारने तृतीयपंथींसाठी मोठा निर्णय घेतला आहे. मुख्यमंत्री रेखा गुप्ता यांच्या सरकारने दिल्ली परिवहन महामंडळ आणि परिवहन विभागाच्या बसेसमध्ये तृतीयपंथींना मोफत प्रवास देण्याच्या प्रस्तावाला मंजुरी दिली आहे. सरकारच्या या निर्णयानंतर दिल्लीत राहणाऱ्या तृतीयपंथींना आता सरकारी बसमध्ये मोफत प्रवास करता येईल.

महिलांना जशी मोफत बस प्रवासाची सुविधा दिली जाते, त्याच धर्तीवर ही सेवा तृतीयपंथींसाठीही लागू करण्यात येणार आहे. सरकारच्या मते, या निर्णयामागचा मुख्य उद्देश तृतीयपंथी समुदायाला सुरक्षित, सुलभ आणि परवडणारा प्रवास उपलब्ध करून देणे हा आहे. त्यामुळे त्यांना नोकरी, व्यवसाय किंवा इतर दैनंदिन गरजांसाठी प्रवास करताना आर्थिक अडचणींचा सामना करावा लागणार नाही.

याबाबत मुख्यमंत्री रेखा गुप्ता यांनी सांगितले की, आमच्या सरकारचे उद्दिष्ट अशी दिल्ली उभारण्याचे आहे, जिथे प्रत्येक नागरिकाला सन्मानासह संधी आणि सार्वजनिक सेवा समानपणे मिळतील. या निर्णयामुळे समाजातील सर्व घटकांमध्ये समता आणि सामाजिक सलोखा वाढेल, असा विश्वास त्यांनी व्यक्त केला. सरकारच्या या निर्णयाचे विविध स्तरांतून स्वागत होत असून, तृतीयपंथी समुदायासाठी हा निर्णय दिल्लीत मोठा दिलासा मानला जात आहे.