Delhi Constable Shoots Wife : राजधानी दिल्लीतील कल्याणपुरी परिसरातून खाकी वर्दीला काळिमा फासणारी धक्कादायक घटना समोर आली आहे. रविवारी आर्ध्या रात्री स्कूटीवर नवरा-बायकोमध्ये सुरू झालेल्या किरकोळ वाद थेट हत्याकांडात बदलला. दिल्ली पोलिसांच्या एएटीएस (AATS) टीममध्ये तैनात असलेल्या एका कॉन्स्टेबल पतीने अवघ्या २ मिनिटांत आपल्याच पत्नीची भररस्त्यात गोळ्या झाडून निर्घृण हत्या केली. धक्कादायक म्हणजे, मृत प्रियंकाचा कालच वाढदिवस होता, पण वाढदिवसाच्या काही तासांतच पतीने तिची क्रूरतेने हत्या केली. या थरारक घटनेने संपूर्ण दिल्ली हादरली असून पोलीस आरोपी पतीचा कसून शोध घेत आहेत.

पूर्व दिल्लीतील कल्याणपुरी परिसरात पोलीस अधिकाऱ्याने आपल्या पत्नीची गोळ्या झाडून हत्या केली. या घटनेनंतर आरोपी घटनास्थळावरून फरार झाला. मृत महिलेचे नाव प्रियांका (३४) होते. पोलिसांनी मृतदेह पोस्टमार्टमसाठी पाठवला आहे. पोलिसांनी याबाबत गुन्हा दाखल केला असून पुढील तपास करण्यात येत आहे. आरोपीचे नाव मनीष भाटी असे असून तो दिल्ली पोलिसात हवालदार आहे.

पोलिसांनी दिलेल्या माहितीनुसार, १२-१३ जुलैच्या मध्यरात्री ३ वाजता कल्याणपुरी पोलिसांना रस्त्यावर एका महिलेचा मृतदेह पडल्याची माहिती मिळाली. त्यानंतर तात्काळ पोलीस घटनास्थळी पोहोचले. त्यांनी तात्काळ जखमी असलेल्या त्या महिलेला लाल बहादूर शास्त्री रुग्णालयात नेण्यात आले होते. ते तिथे पोहोचले तेव्हा तिला मृत घोषित करण्यात आले.

पोलिसांनी या प्रकरणाचा तपास सुरू केला. तपास केल्यावर असे आढळून आले की, एका डिलिव्हरी बॉयने रस्त्यावर पडलेला मृतदेह पाहिला होता. त्याने त्या महिलेला रुग्णालयात नेले होते. त्या महिलेची ओळख ईस्ट विनय नगर येथील रहिवासी प्रियांका अशी पटली. आदल्या दिवशी प्रियांकाचा वाढदिवस होता, पण तिच्या पतीने तिला वाढदिवसाच्या शुभेच्छाही दिल्या नव्हत्या. प्रियांकाने ही गोष्ट तिच्या वडिलांना सांगितली होती. तिचा मृतदेह सापडलेली जागा त्यांच्या घरापासून अगदी काही पावलांवरच होती. त्यांच्या लग्नाला फक्त तीन वर्षे झाली होती. दरम्यान, प्रियांकाने मनीषविरुद्ध हुंडा छळाची तक्रार दाखल केली होती.

तपासात असे उघड झाले की, काही वेळापूर्वीच प्रियंका तिचा पती मनीषसोबत स्कूटरवरून जाताना दिसली होती. वाटेत त्यांच्यात वाद झाला. आरोपीने पिस्तूल काढून महिलेच्या छातीत गोळी झाडली आणि घटनास्थळावरून पळून गेला. आरोपीने सरकारी शस्त्राने गुन्हा केला की दुसऱ्या कोणत्या शस्त्राने, हे त्याच्या अटकेनंतरच कळेल. हत्येमागील हेतू सध्या अस्पष्ट आहे. आरोपीच्या शोधासाठी पोलिसांची काही पथके तैनात केली आहेत.