नवी दिल्ली : केंद्रीय कर्मचाऱ्यांना दिलासा देणारी बातमी हाती आली आहे. गुढी पाडवाच्या दोन दिवसआधीच सरकारने केंद्रीय कर्मचाऱ्यांना गोड बातमी दिली आहे. केंद्र सरकारने केंद्रीय कर्मचाऱ्यांचा महागाई भत्त्यात २ टक्क्यांनी वाढ केली आहे. यामुळे केंद्रीय कर्मचाऱ्यांच्या पगारात मोठी वाढ होणार आहे.

केंद्र सरकारची कॅबिनेट आज शुक्रवारी पंतप्रधान नरेंद्र मोदी यांच्या नेतृत्वात झाली. या कॅबिनेटमध्ये केंद्रीय कर्मचाऱ्यांच्या महगाई भत्त्यात दोन टक्क्यांनी वाढ करण्याचा निर्णय घेण्यात आला. केंद्रीय कर्मचाऱ्यांच्या पगारात महागाई भत्ता आणि महागाई सवलत जोडला जाणार आहे. कॅबिनेटमध्ये घेतलेल्या निर्णयानुसार मागील तीन महिन्यांचा महागाई भत्ता आणि महागाई सवलत थकबाकी एकत्र मिळणार आहे.

कॅबिनेटच्या निर्णयामुळे १ कोटींहून अधिकारी सरकारी कर्मचारी आणि पेन्शनधारकांना दिलासा मिळणार आहे. सरकारने ही घोषणा १५ ते २० दिवस उशीरा केली आहे. त्यामुळे तीन महिन्यांचा महागाई भत्ता एकत्र एप्रिल महिन्यात मिळणार आहे.

सरकार महागाई भत्त्याची घोषणा होळी आणि दिवाळीच्या आधी करत असतं. मात्र, यंदा जानेवारी-जूनच्या महागाई भत्ता वाढीची घोषणा होळीच्या आधी केली जोता. मात्र, सरकारने महागाई भत्ता वाढीची घोषणा मार्च महिन्याच्या शेवटच्या आठवड्यात केली. महागाई भत्यात मागील सात वर्षांतील सर्वात कमी वाढ केली आहे. सरकारकडून महागाई भत्त्यात साधारण कमीत कमी ३ टक्के ते ४ टक्के वाढ केली जाते. यंदा महागाई भत्यात २ टक्के दरवाढ केली आहे.

सरकारच्या महागाई भत्त्यात वाढ केल्यानं कर्मचाऱ्यांचा महागाई भत्ता आता ५३ टक्क्यांहून ५५ टक्के झाला आहे. पेन्शन धाराकांसाठी महागाई सवलतीत वाढ करण्यात आली आहे. उदा. सरकारी कर्मचाऱ्याचं मूळ वेतन १८००० रुपये असेल. तर त्यांना महिना ३६० रुपये महागाई भत्ता मिळेल. त्यामुळे कर्मचाऱ्याला वार्षिक ४३२० रुपये महागाई भत्ता मिळणार आहे.