पेट्रोल पंपावर काम करणाऱ्या कर्मचाऱ्याच्या छातीवर एका तरुणीने रिव्हॉल्व्हर रोखल्याचा व्हिडीओ सध्या सोशल मीडियावर प्रचंड व्हायरल होत आहे. व्हिडीओ व्हायरल झाल्यानंतर पोलिसांनी कर्मचाऱ्याच्या तक्रारीवरुन आरोपींच्या विरुद्ध गुन्हा दाखल करण्यात आला आहे. पोलिसांनी मुलीला आणि तिच्या वडिलांना ताब्यात घेतले आहे. तसेच रिव्हॉल्व्हर देखील जप्त केले आहे. ही घटना उत्तरप्रदेशमधील हरदोई जिल्ह्यात घडली आहे.

गाडीत सीएनजी भरत असताना कर्मचाऱ्याने गाडीत बसलेल्या लोकांना खाली उतरण्यास सांगितले. त्यावेळेस हा वाद झाला. भांडण सुरु झाल्यानंतर मुलीने सेल्समनच्या छातीवर रिव्हॉल्व्हर रोखत धमकी दिली. या घटनेमुळे घटनास्थळी खळबळ उडाली आहे. घटनेचा व्हिडीओ व्हायरल झाल्यानंतर आणि कर्मचाऱ्याने तक्रार केल्यानंतर पोलिसांनी गुन्हा दाखल करुन कायदेशीर कारवाई केली.

व्हायरल व्हिडीओमध्ये पेट्रोल पंपावरील कर्मचारी तरुणीच्या वडिलांसोबत बोलत असल्याचे दिसते. एकजण भांडण सोडवत असल्याचेही पाहायला मिळते. तरुणीचे वडील तावातावात कर्मचाऱ्यांवर ओरडत होते. तेवढ्यात मागून तरुणी धावत येते आणि हातातील रिव्हॉल्व्हर कर्मचाऱ्याच्या छातीवर रोखते. 'इतक्या गोळ्या घालेन, तुझ्या घरचे तुला ओळखू शकणार नाही', असे म्हणत तरुणी कर्मचाऱ्याला धमकावते. त्यानंतर काहीजण मध्यस्थी करताना व्हिडीओत दिसते.

या घटनेचा व्हिडीओ सोशल मीडियावर प्रचंड व्हायरल होत आहे. पोलिसांनी तरुणी आणि तिच्या वडिलांच्या विरोधात गुन्हा दाखल केला. तरुणी आणि तिच्या वडिलांना ताब्यात घेतले. तरुणीकडून रिव्हॉल्व्हर जप्त करण्यात आली आहे. काही तास चौकशी केल्यानंतर पोलिसांनी तरुणीला आणि तिच्या वडिलांना सोडून दिल्याचे म्हटले जात आहे.