Congress MP : काँग्रेसच्या एका खासदाराला भांडण सोडवायला जाणं महागात पडलं आहे. बिहारच्या सासाराम लोकसभा मतदारसंघाचे खासदार मनोज कुमार मिरवणूकीमध्ये सामील झाले होते. तेव्हा मिरवणूकीतील लोक आणि एका शाळेच्या बस चालकांमध्ये वाद सुरु झाला. मनोज कुमार यांनी वाद सोडवण्याचा प्रयत्न केला. या प्रयत्नात त्यांनाच मार खावा लागला.

खासदार मनोज कुमार यांचा भाऊ पीएसीएस निवडणुकीत विजय झाली. या निमित्ताने कार्यकर्त्यांनी मिरवणूक काढली होती. यात मनोज कुमारही होते. ही मिरवणूक बिहारच्या नाथोपूर गावाच्या सेंट जॉन इंटरनॅशनल स्कूल या शाळेजवळून जात होती. दरम्यान मिरवणूकीतील लोकांनी शाळेच्या बसचालकांशी वाद घातला आणि शाळेजवळच राडा सुरु झाला.

भांडण सोडवण्याच्या उद्देशाने मनोज कुमार यांनी मध्यस्थी करण्याचा प्रयत्न केला. पण हाणामारीत जमावाने त्यांना चोप दिला. त्यांच्या डोक्याला जबर मार लागल्याची माहिती समोर आली आहे. भांडण सुरु असताना काही लोक काठ्या घेऊन आले. त्यांना समजवण्याचा प्रयत्न मनोज यांनी केला. पण हल्लेखोरांनी मनोज यांना मारहाण करायला सुरुवात केली, असे मनोज कुमार यांचे बंधू मृत्यूंजय भारती यांनी सांगितले.

या घटनेची माहिती मिळताच पोलीस अधीक्षक मोहनिया आणि त्यांची टीम घटनास्थळी पोहोचली. पोलिसांनी खासदार मनोज कुमार यांना रुग्णालयात दाखल करण्यासाठी पाठवले. त्यांच्यावर सध्या उपचार सुरु आहेत. पोलिसांच्या उपस्थितीमध्ये सेंट जॉन इंटरनॅशनल स्कूलच्या सर्व विद्यार्थ्यांना घरी पाठवण्यात आले.