ज्ञानेश कुमारांच्या राजीनाम्यासाठी देशभरात काँग्रेसनं आंदोलनाचं हत्यार उपसलयं.अशातच दिल्लीत काँग्रेस वर्किंग कमिटीच्या बैठकीत लोकसभेचे विरोधी पक्षनेते राहुल गांधी यांनी निवडणुक आयोगाविरोधात आक्रमक भूमिका घेतलीय. ज्ञानेश कुमारांच्या राजीनाम्याबद्दल आक्रमक भूमिका घेत काँग्रेसच्या बैठकीत राहुल गांधींनी देशव्यापी आंदोलनाचा कसा इशारा दिलाय,पाहूयात.

ज्ञानेश कुमार यांनी राजीनामा दिलाच पाहिजे. पंतप्रधान स्वतः त्यांना राजीनामा द्यायला लावतील. ज्ञानेश कुमार यांनी राजीनामा दिला तरी चालेल, नाही दिला तर अधिक चांगलं. कारण आमचे आंदोलन सुरूच राहील. जोपर्यंत ज्ञानेश कुमार जात नाहीत, तोपर्यंत आम्ही राजीनाम्याच्या मागणीवर ठाम राहू. इंडिया आघाडीच्या बैठकीनंतर रामलीला मैदानावर किंवा राज्यात कुठे मोर्चे काढायचे हे ठरवले जाईल. इंडिया आघाडीच्या बैठकीत रामलीला मैदानावर आंदोलन करण्याचा प्रस्ताव ठेवला जाईल.

दरम्यान खासदार प्रियंका गांधींनीही ज्ञानेश कुमार कसा राजीनामा देणार नाहीत? असा सवाल बैठकीत उपस्थित केलाय. त्याव्यतिरिक्त काँग्रेस वर्किंग कमिटीच्या बैठकीत कोणत्या तीन मागण्यांवर काँग्रेस नेत्याचं एकमत झालंय. पाहूयात.

काँग्रेसच्या 3 मागण्या

1 ज्ञानेश कुमार यांनी राजीनामा द्यावा

2 SIR रद्द करण्यात यावा, मतदार यादीतून वगळलेली 13 कोटी नावे पुन्हा समाविष्ट करावीत

3 पंतप्रधान आणि गृहमंत्री यांनी याची जबाबदारी घ्यावी

ज्ञानेश कुमारांना हटवण्यासाठी काँग्रेस आक्रमक

30 सप्टेंबरला इंडिया आघाडीची बैठक आहे. या बैठकीत सर्व विरोधी पक्षांचे अध्यक्ष आणि प्रमुख नेते उपस्थित राहणार आहेत. त्यामुळे या बैठकीच्या एक दिवस आधीच काँग्रेसनं आपल्या कार्यकारिणीची बैठक घेऊन केंद्र सरकार आणि ज्ञानेश कुमारांच्या विरोधात आक्रमक रणनीती आखल्याची चर्चा आहे.

ज्ञानेश कुमारांना हटवण्यासाठी काँग्रेस इंडिया आघाडीचा संयुक्तपणे मोर्चा काढण्याच्या तयारीत आहे. त्यामुळे इंडिया आघाडीच्या बैठकीत यावर इतर पक्ष काय मुद्दे मांडतात आणि काँग्रेस त्यावर काय भूमिका घेणार याकडे सर्वांचं लक्ष लागलंय.