संतोष शाळीग्राम

नवी दिल्ली - दक्षिण आफ्रिकेत सापडलेल्या कोरोना विषाणूचे नवीन प्रकार ओमायक्रॉन आता भारतात पसरत आहे. महाराष्ट्र, गुजरात आणि कर्नाटकनंतर ओमायक्रॉनने देशाची राजधानी दिल्लीत पाऊल ठेवले आहे. ओमायक्रॉनचा पहिला रुग्ण दिल्लीत आढळून आला आहे. मात्र लसीचे दोन्ही डोस घेतल्याने त्याला कोरोनाची सामान्य लक्षणं दिसून येत आहेत. त्याच्या जीवालाही धोका नसल्याचे डॉक्टरांनी सांगितले आहे.

हे देखील पहा -

टांझानियाहून दिल्लीत आलेल्या 37 वर्षीय व्यक्तीला 'ओमिक्रॉन'ची लागण झाल्याचे स्पष्ट झाले आहे. या रुग्णावर सध्या लोकनायक जयप्रकाश रुग्णालयात म्हणजेच एलएनजेपी रुग्णालयात उपचार सुरू आहेत आणि त्याच्यामध्ये कोरोनाची काही सामान्य लक्षणे आहेत.

एलएनजेपी रुग्णालयातील डॉ. सुरेश कुमार यांनी रुग्णालयात दाखल झालेल्या रुग्णाच्या आजाराबाबत माहिती दिली आहे. त्यानुसार टांझानियाहून आलेल्या रुग्णाला ओमिक्रॉनची लागण झाली आहे, त्याला घसा खवखवणे, अशक्तपणा आणि त्याचे अंग दुखत आहे. त्याने लसीचे दोन्ही डोस घेतले होते, त्यामुळे त्याला किरकोळ लक्षणे दिसत आहेत आणि त्याची प्रकृती फारशी वाईट नाही. त्यांचे विलगीकरण केले आहे.

Edited By - Shivani Tichkule