CM Eknath Shinde Meet Amit Shah : राज्यात सत्तास्थापन झाल्यानंतर शिंदे सरकारमधील प्रमुख नेत्यांच्या दिल्लीत बैठका वाढल्या आहेत. याशिवाय मुख्यमंत्री एकनाथ शिंदेही सध्या दिल्ली दौऱ्यावर आहेत. यादरम्यान शिंदेंनी (Eknath Shinde) गुरूवारी रात्री उशिरा केंद्रीय गृहमंत्री अमित शाह (Amit Shah) यांची भेट घेतली. या भेटीत दोघांमध्ये जवळपास ४० मिनिटं चर्चा सुरू होती.

शिवसेनेसोबत सुरू असलेला संघर्ष, सर्वोच्च न्यायालयातील सुनावणी आणि दसरा मेळावा अशा महत्वाच्या विषयावर यावेळी चर्चा झाली असल्याची शक्यता आहे. मात्र, ही भेट राजकीय नसून सदिच्छा भेट होती असं एकनाथ शिंदे यांनी सांगितलं आहे.

दिल्ली दौऱ्यावर असलेल्या एकनाथ शिंदे यांची गुरुवारी संध्याकाळपर्यंत कोणत्याही केंद्रीय नेत्यासोबत भेट झाली नव्हती. पण रात्री उशिरा ते अमित शाह यांच्या भेटीसाठी पोहोचले. एकनाथ शिंदे यांनी ट्विट करत अमित शाह यांच्या भेटीचे फोटो शेअर केले आहेत.

अमित शाह यांच्यासोबत झालेली भेट राजकीय नसून सदिच्छा भेट होती, असं एकनाथ शिंदे यांनी सांगितलं आहे. या भेटीदरम्यान राज्यातील विकासकामांसह अनेक विषयांवर सविस्तर चर्चा करण्यात आली असल्याचंही त्यांनी सांगितलं आहे.

शिंदे गटाची मंत्रिपदावरून नाराजी?

दुसरीकडे शिंदे गटाला मिळालेल्या खात्यांबाबत असमाधानी असल्याचे बोलले जात आहे. ग्रामीण भागाशी निगडित एखाद दुसरे खाते मिळावे अशी शिंदे गटातील मंत्र्यांची इच्छा आहे. शिंदे गटाकडे आता कृषी आणि फलोत्पादन ही दोनच खाती ग्रामीण भागाशी सबंधित आहेत. ग्राम विकास, जलसंपदा किंवा सार्वजनिक बांधकाम यापैकी एक खाते शिंदे गटाला हवे आहे, याबाबत मुख्यमंत्री एकनाथ शिंदे भाजप पक्षश्रेष्ठीशी चर्चा करण्यासाठी दिल्लीत गेले असल्याचे बोलले जात आहे.