China News : चीनमधील एक प्राणी संग्रहालय सोशल मीडियावर चर्चेचा विषय बनले आहे. चीनच्या सिचुआन प्रांतातील एका प्राणी संग्रहालयामध्ये वाघाची लघवी विकली जात आहे. लघवीच्या सेवनाने संधिवातासह अन्य आजार बरे होणार असल्याचा दावा केला जात आहे. वाघाची लघवी व्हाइट वाइनसोबत पिणे अधिक फायदेशीर असल्याचेही तेथील अधिकारी म्हणत आहेत.

साउथ मॉर्निंग चायना पोस्टच्या वृत्तानुसार, सिचुआन प्रांतातील के यान बिफेंगक्सिया वाइल्डलाइफ या प्राणी संग्रहालयाने वाघाची लघवी व्हाइट वाइनमध्ये मिसळून प्यायल्या शरीराला फायदा होतो असा दावा केला आहे. प्राणी संग्रहालयातून आलेल्या एका व्यक्तीने या गोष्टीची माहिती सोशल मीडियावर शेअर केली आहे. सायबेरियन वाघाची २५० एमएल लघवी ५० युआन (६०० रुपये) इतक्या किंमतीला विकली जात आहे.

बाटलीवर लघवीच्या प्राशनामुळे संधिवात, दुखापत आणि स्नायूंशी संबंधित वेदनांपासून आराम मिळतो असे लिहिलेले आहे. लघवी आल्याच्या तुकड्याबरोबर प्यायची असेही तेथे लिहिले आहे. कोणाला एलर्जी असेल तर त्यांनी लघवी पिऊ नये असेही म्हटले आहे. संधिवातासह अन्य आजारांवर मात करण्यासाठी चीनी लोक वाघाची लघवीचे सेवन करत आहे.

चीनमधील एका फार्मासिस्टने यावर भाष्य केले आहे. 'या प्रकारामुळे वाघांच्या संवर्धनाला हानी पोहचत आहे. त्याशिवाय पारंपारिक चीनी औषधांची बदनामीही होत आहे. वाघाची लघवी उपचार म्हणून वापरली जाऊ शकते याचा कोणताही पुरावा नाही. मात्र या व्यवसायाचा परवाना आपल्याकडे असल्याचा दावा प्राणी संग्रहालयाने केला आहे', असे त्याने म्हटले आहे.