नारायणपूर : छत्तीसगडच्या नारायणपूरमधून एक मोठी बातमी समोर आली आहे. छत्तीसगडधील घनदाट अबूझमाड जंगलात गेल्या दोन दिवसांपासून सुरक्षा दल आणि नक्षलवाद्यांमध्ये चकमक सुरु आहे. या चकमकीत पोलिसांनी ८ नक्षलवाद्यांना यमसदनी धाडलं आहे.

जंगलात गेल्या २ दिवसांपासून नक्षलवादी आणि सुरक्षा दलामध्ये चकमक सुरु आहे. नक्षलवाद्यांवर कारवाई करण्यासाठी छत्तीसगडच्या अबूझमाड जंगलात सुरक्षा दलाने ऑपरेशन सुरु केलं होतं. डीआरजी, एसटीएफ आणि आयटीबीपीच्या ५३ व्या बटालयीनच्या सैन्यांनी संयुक्तपणे नक्षलवाद्यांविरोधात मोहीम राबवली.

या मोहिमेत सुरक्षा दलाच्या जवानांनी ८ नक्षलवाद्यांच्या खात्मा केल्याची माहिती समोर येत आहे. एनआय वृत्त संस्थेकडून या चकमकीत ५ नक्षलवाद्यांचा खात्मा केल्याचं सांगण्यात येत आहे. तर इतर वृत्त माध्यमांनी या चकमकीत ८ नक्षलवाद्यांचा खात्मा केल्याची माहिती दिली आहे.

घनदाट जंगलाच चकमक सुरुच

छत्तीसगडच्या नारायणपूरमध्ये पोलीस आणि नक्षलवाद्यांमध्ये चकमक सुरूच असल्याची माहिती मिळत आहे. अबूझमाडच्या जंगलात झालेल्या चकमकीत एक जवान जखमी झाल्याची माहितीही समोर आली आहे. या घटनेत ८ नक्षलवाद्यांचा खात्मा केल्यांनंतरही सुरक्षा दलाची कारवाई सुरू आहे. नक्षलवाद्यांच्या माहिती मिळाल्यावर सुरक्षा दलांनी सीमावर्ती जिल्ह्यांसह संयुक्त कारवाई सुरू केली.

दरम्यान, छत्तीसगडमध्ये नारायण-दंतेवाडा सीमेवर काही दिवसांपूर्वी देखील सुरक्षा दल आणि नक्षलवाद्यांमध्ये चकमक झाली होती. या चकमकीत ७ नक्षवाद्यांचा खात्मा करण्यात आला होता. दंतेवाडा आणि कोंडागाव जिल्ह्यावरील सीमवरील मुंगेडी आणनि गोबेल क्षेत्रातील गावात काही नक्षली लपल्याची माहिती मिळाली होती. त्यानंतर सुरक्षा दलाच्या जवानांनी ही कारवाई केली.