छत्तीसगडमध्ये झालेल्या दोन वेगवेगळ्या चकमकीत सुरक्षा दलांनी १४ नक्षलवाद्यांचा खात्मा केलाय. सुकमाच्या किस्ताराम भागात आणि विजापूरमध्ये झालेल्या चकमकीत नक्षलवाद्यांना कंठस्नान घातलण्यात आलं. सुकमामधील १२ तर विजापूरमध्ये २ नक्षलवाद्यांना ठार करण्यात आलं. सुरक्षा दलानं सर्वांचे मृतदेह आणि शस्त्रे जप्त केली आहेत.

दरम्यान परिसरात शोध मोहीम सुरू आहे . दोन्ही बाजूंनी अधूनमधून गोळीबार सुरू आहे. याच दरम्यान छत्तीसगडचा मोस्ट वॉन्टेड नक्षलवादी, विशेष क्षेत्रीय समिती सदस्य (एसझेडसीएम) देवा बरसेनं हैदराबादमध्ये आत्मसमर्पण केले आहे. देवासोबत इतर २० नक्षलवाद्यांनीही आत्मसमर्पण केले आहे.

नक्षलवाद्यांची माहिती मिळाल्यावरून सुकमाच्या किस्ताराम भागात डीआरजी टीम रवाना करण्यात आली. या कारवाईदरम्यान शनिवारी सकाळी ८ वाजता चकमक सुरू झाली. यात सुरक्षा दलाने १२ नक्षलवाद्यांना कंठस्नान घातलं. मृतदेह आणि शस्त्रे जप्त करण्यात आली आहेत. शोध सुरू आहे. सुकमाप्रमाणे विजापूरमध्येही नक्षलवादी असल्याची माहिती सुरक्षा दलांना मिळाली होती. त्यानंतर विजापूरमध्ये शोध मोहीम सुरू करण्यात आली.

शनिवारी सकाळी डीआरजी (जिल्हा राखीव रक्षक) पथक नक्षलविरोधी कारवाईवर असताना नक्षलवाद्यांनी गोळीबार केला. पहाटे ५ वाजल्यापासून अधूनमधून चकमक सुरूय. शोध मोहिमेदरम्यान चकमकीच्या ठिकाणाहून दोन नक्षलवाद्यांचे मृतदेह सापडलेत. पोलीस अधीक्षक जितेंद्र यादव यांनी चकमकीची पुष्टी केलीय. ठार झालेल्यांमध्ये एकावर ५ लाख रुपयांचा इनाम होते. तो क्षेत्र समिती सदस्य होता, तर दुसऱ्यावर ८ लाख रुपयांचे इनाम होते.

याआधी २५ डिसेंबर रोजी सुरक्षा दलांनी छत्तीसगडच्या शेजारील राज्यातील ओडिशामध्ये नक्षलवाद्यांचा खात्मा केला. येथील कंधमाल येथे झालेल्या चकमकीत सहा जण ठार झाले होते. यामध्ये केंद्रीय समिती सदस्य (सीसीएम) गणेश उईके (६९) यांचा समावेश आहे. ज्यांच्यावर १ कोटी रुपयांचे इनाम होते. दोन महिला नक्षलवादी देखील मारल्या गेल्या. मारल्या गेलेल्या नक्षलवाद्यांचे मृतदेह आणि शस्त्रे जप्त करण्यात आली होती.