मध्य प्रदेशमधील गुना जिल्ह्यात असलेल्या सारेठा गावात कौटुंबिक वादातून गोळ्या झाडून हत्या केल्याची घटना समोर आली आहे. या घटनेत भारतीय जनता पक्षाचे मध्य प्रदेशचे जिल्हा मंत्री वीर बहादूर सिंह सारेठा यांचे धाकटे बंधू विजय सिंह यांचा मृत्यू झाला आहे. सोमवारी रात्री सुमारे 8 वाजेच्या सुमारास ही घटना घडली. या घटनेमुळे गावात खळबळ उडाली आहे.

मिळालेल्या माहितीनुसार, सारेठा गावातील रहिवासी विजय सिंह हे त्यांचा पुतण्या शांतनू शेतावर जात होते. यावेळी वाटेत दबा धरून बसलेल्या भारत यादव आणि त्याचा मुलगा विशाल यांनी त्यांच्यावर हल्ला केला. आरोपीनी सर्वात आधी काठीने मारहाण करून शांतनू याला जखमी केले. त्यानंतर विशाल याने बंदुकीतून विजय सिंह यांच्या डाव्या पायावर गोळी झाडली. गोळी लागल्याने विजय सिंह गंभीर जखमी झाले. त्यांना उपचारासाठी रुग्णालयात दाखल करण्यात आले. मात्र मोठ्या प्रमाणात रक्तस्त्राव झाल्याने उपचारादरम्यान त्यांचा मृत्यू झाला. या घटनेमुळे कुटुंबियांवर दु:खाचा डोंगर कोसळला आहे.

घटनेनंतर सिरसी पोलीस ठाण्याच्या पोलिसांनी कारवाई करत आरोपी भारत सिंह आणि त्याचा मुलगा विशाल यांना अटक केली आहे. या हल्ल्यात वापरण्यात आलेली बंदूक बेकायदेशीर असल्याचे सांगितले जात आहे. पोलिसांनी आरोपींविरोधात हत्येचा गुन्हा दाखल केला असून पुढील तपास सुरू केला आहे.

या हत्येमागे कौटुंबिक वाद आणि जुनी वैयक्तिक दुश्मनी असल्याची प्राथमिक माहिती समोर आली आहे. मात्र, या वादाचे नेमके कारण अद्याप स्पष्ट झालेले नाही. हल्ल्यामागील कारण, वापरण्यात आलेले शस्त्र आणि घटनेशी संबंधित इतर बाबींचा पोलीस तपास करत आहेत. तपास पूर्ण झाल्यानंतर या प्रकरणातील अधिक माहिती समोर येण्याची शक्यता आहे.