मध्य प्रदेशातील सिधी जिल्ह्यातून एक धक्कादायक प्रकार समोर आला आहे. जिल्ह्यातील एका गावात राहणाऱ्या महिलेने भाजप नेत्यावर लैंगिक छळाचे गंभीर आरोप केले आहेत. या आरोपानंतर भाजप नेत्याविरोधात बीएनएस कलमांखाली गुन्हा दाखल करण्यात आला आहे. याची माहिती मिळताच भाजपने आरोपीला पक्षातून निष्कासित केले असून, या प्रकरणाचा सखोल तपास पोलिसांकडून सुरू आहे.

सुरेश सिंह असे भाजप पदाधिकाऱ्याचे नाव आहे. सुरेश यांच्यावर एका महिलेने गंभीर आरोप केले आहेत. लैंगिक अत्याचार केल्याचा आरोप करत तिने पोलिसांकडे तक्रार दाखल केली आहे. सुरेश यांच्यावर गुन्हा दाखल झाल्यानंतर भाजपने त्यांना पक्षातून निष्कासित केले आहे.

सोमवारी पोलिस उपअधीक्षक गायत्री तिवारी यांनी सांगितले की, सुरेश सिंह यांच्याविरुद्ध भारतीय दंड संहितेच्या (BNC) कलम ७४ (महिलेवर विनयभंग करण्याच्या उद्देशाने तिच्यावर गुन्हेगारी बळाचा वापर), ७५ (लैंगिक छळ) आणि ३५१ (२) (गुन्हेगारी धमकी) अंतर्गत गुन्हा दाखल करण्यात आला आहे.

तपासानंतर कारवाई केली जाईल'

डेप्युटी एसपी म्हणाले, या प्रकरणाचा सखोल तपास करून पुढील कारवाई केली जाईल. दरम्यान, भाजपच्या सिधी जिल्हा युनिटचे सुरेश सिंह यांना रविवारी त्यांच्या पदावरून काढून टाकण्यात आले. त्यांच्या "अशोभनीय कृत्याबद्दल" प्रदेश पक्षाध्यक्ष व्हीडी शर्मा यांनी पक्षातून निष्कासित केले.