बिहारमधून एक धक्कादायक बातमी उघडकीस आली आहे. पोलीस वसाहतीतील खोलीत सब-इन्स्पेक्टरचा मृतदेह आढळल्यानं खळबळ उडाली आहे. बोधगया येथील बीएमपी-३ मधील एएसआय राजेश कुमार सिंह यांचा मृतदेह गळफास घेतलेल्या अवस्थेत आढळला. या घटनेमुळे संपूर्ण पोलीस दलात एकच खळबळ उडाली आहे. त्यांनी आत्महत्या का केली? याचा शोध पोलिसांकडून सुरू आहे.

राजेश कुमार सिंह हे छपरा जिल्ह्यातील सोनपूर पोलीस ठाण्याच्या हद्दीतील गंगाजल गावचे रहिवासी होते. राजेश यांनी टोकाचं पाऊल उचलल्यानंतर कुटुंबावर दुखा:चा डोंगर कोसळला आहे. त्यांच्या मृत्यूबाबत कुटुंबीयांनी गंभीर आरोप केले असून, गेल्या काही दिवसांपासून ड्युटीसाठी पोलीस कमांडंटकडून त्यांच्यावर अत्याचार होत असल्याचा दावा केला आहे.

मिळालेल्या माहितीनुसार, राजेश कुमार सिंह यांची २०२० मध्ये कॉन्स्टेबल म्हणून पोलिस दलात भरती झाली होती. शनिवारी रात्री त्यांचा मृतदेह पोलीस वसाहततील एका खोलीत फासावर लटकलेल्या अवस्थेत आढळला. या घटनेची माहिती मिळताच खळबळ उडाली. बोधगया पोलिसांनी घटनास्थळी धाव घेतली.

घटनास्थळी दाखल झालेल्या बोधगया पोलीस ठाण्याच्या अधिकाऱ्यांनी मृतदेह ताब्यात घेतला. तसेच शवविच्छेदनासाठी मगध मेडिकल कॉलेजमध्ये पाठवण्यात आले आहे. पोलिसांकडून या प्रकरणाचा तपास सुरू करण्यात आला आहे. सध्या त्यांनी टोकाचं पाऊल का उचललं? याचा शोध पोलिसांकडून सुरू आहे.