बिहार विधान परिषदेचे अध्यक्ष अवधेश नारायण सिंह यांनी आपल्या पदाचा राजीनामा दिलाय. त्यांनी सोमवारी (२८ सप्टेंबर २०२६ रोजी आपला राजीनामा दिला. ते भाजपच्या कोट्यातून सभापतीपदावर विराजमान झाले होते. अवधेश सिंह यांच्या राजीनाम्यानंतर आता हे पद जेडी(यू)कडे गेल्याची चर्चा आहे. त्यामुळे विधान परिषदेचे पुढील अध्यक्ष जेडी(यू)च्या कोट्यातील असतील.

अवधेश नारायण सिंह यांच्या राजीनाम्यानंतर, जेडी(यू)मधून पुढील सभापती कोण होणार, हा चर्चेचा मुख्य विषय ठरला आहे. कोणाच्या नावाची चर्चा होत आहे? अहवालांनुसार, जेडी(यू)चे एमएलसी आणि विधान परिषदेचे उपसभापती रामबच्चन राय यांची पुढील सभापती म्हणून नियुक्ती होऊ शकते.

राजीमाना पत्रात काय म्हणाले अवधेश सिंह?

अवधेश नारायण सिंह यांनी आपल्या राजीनामा पत्रात लिहिलंय की, आज मी बिहार विधान परिषदेच्या अध्यक्षपदाचा राजीनामा दिलाय. भारतीय जनता पक्षाच्या कार्यकर्त्याच्या रुपात मी माझ्या राजकीय करिअर सुरू केलं होतं. पक्ष संघटनेतील अनेक पदावर काम करताना मी संघटनेच्या विस्तारासाठी नेहमी सक्रीय होतो. एनडीएच्या सरकारमधील सर्व नेत्याचे मी आभार मानतो.

या पत्रात सिंह यांनी बिहारचे माजी मुख्यमंत्री नितीश कुमार यांचेही आभार मानलेत. एनडीएच्या सरकारमध्ये मला चारवेळा विधान परिषदेचं अध्यक्ष बनवण्याची संधी मिळाली. ही परिषदेच्या अध्यक्षपदाची जबाबदारी संभाळताना मला नितीश कुमार यांचे खूप सहकार्य लाभले. यासह अवधेश नारायण सिंह यांनी तत्कालीन मुख्यमंत्री सम्राट चौधरी यांचेही आभार मानलेत.

अवधेश नारायण यांनी सांगितले की, ३३ वर्षे विधान परिषदेचे सदस्य म्हणून काम करणे ही त्यांच्यासाठी अभिमानाची बाब होती. त्यांनी पुढे नमूद केले की, सदस्य म्हणून ते सभागृहात आपली सक्रिय भूमिका बजावत राहतील. शेवटी ते म्हणाले, "सभागृहाचे सभापती असताना मला मिळालेले प्रेम आणि सहकार्य याबद्दल मी सर्व सन्माननीय सदस्यांचे आभार मानतो."