बेल्जियममधील अँटवर्प शहरातील एका १०-मजली ​​निवासी इमारतीत भीषण आग लागली आहे. या घटनेत अनेकांचा मृत्यू झाल्याचं वृत्त आहे. अधिकाऱ्यांनी दिलेल्या माहितीनुसार, स्थानिक वेळेनुसार सकाळी ९:५३ वाजता अग्निशमन दलाला अँटवर्पच्या 'लिंकेरोव्हर' (Linkeroever) भागातील एका इमारतीच्या आठव्या मजल्यावर भीषण आग लागल्याची माहिती फोन कॉलवरून मिळाली होती.

या दुर्घटनेप्रकरणी पोलिसांनी दिलेल्या माहितीनुसार, आगीच्या भक्षस्थानी पडलेल्या इमारतीत २०० हुन अधिक जण राहत होते. इमारतीला आग लागल्याची माहिती मिळताच अग्निशमन दलाचे पथक घटनास्थळी दाखल झाले असून त्यांनी इमारतीमधील रहिवाशांना बाहेर सुरक्षितस्थळी नेलं आहे. अधिकाऱ्यांनी दिलेल्या माहितीनुसार, आगीच होरपळून अनेकांचा मृत्यू झाला आहे. परंतु मृतांचा आकडा किती आहे, याचा खुलासा अद्याप करण्यात आला नाहीये.

आगीचे नेमके कारण अद्याप समजू शकलेले नाही. बचाव पथके अजूनही इमारतीच्या आत आहेत. आत नेमके किती लोक अडकलेत याचा आकडा समोर आला नाहीये. अधिकाऱ्यांनी मृतांची किंवा जखमींची नेमकी संख्या अद्याप जाहीर केलेली नाही. दुपारी १२ च्या सुमारास अग्निशमन दलाच्या जवानांनी माहिती दिली की, आग अजूनही नियंत्रणात आलेली नाही.

अग्निशमन दलाच्या प्रवक्त्या मेरी डी क्लर्क म्हणाल्या, "आग अजून विझलेली नाही आणि ती नियंत्रणातही आलेली नाही. आगीचे कारण शोधण्यासाठी तपास सुरू आहे." या घटनेची अत्यंत गांभीर्याने दखल घेत आपत्कालीन अधिकाऱ्यांनी वैद्यकीय मदत व्यवस्था कार्यान्वित केली आहे. आग नियंत्रणात आणण्यासाठी आणि बचावकार्य राबवण्यासाठी स्थानिक अग्निशमन दलाच्या जवानांना मदत करण्याकरिता वासलँड (Waasland), केम्पेन (Kempen), रँड आणि रिव्हिरनँड (Rivierenland) यांसारख्या शेजारील भागांतील अग्निशमन पथके तैनात करण्यात आल्या आहेत.