बांगलादेशचे राष्ट्रपती मोहम्मद शहाबुद्दीन यांनी पदाचा राजीनामा दिला आहे. शेख हसिना यांच्याशी लंडनच्या दौऱ्यावर असताना संपर्क साधण्याचा प्रयत्न केल्यामुळे शहाबुद्दीन हे वादात सापडले होते. रिपोर्टनुसार, बांगलादेशमध्ये सत्तापरिवर्तन झाल्यानंतर शेख हसिना यांनी देश सोडला होता. प्रकृतीच्या कारणास्तव लंडनच्या दौऱ्यावर गेलेले शहाबुद्दीन यांनी शेख हसिना यांना संपर्क करण्याचा प्रयत्न केला होता. त्यानंतर बांगलादेशच्या राजकारणात खळबळ माजली होती. शहाबुद्दीन हे वादात सापडले होते. राजकीय निष्ठेवर प्रश्नचिन्ह उपस्थित करण्यात आले होते.

बांगलादेशात सध्या बीएनपीचे सरकार आहे. माजी पंतप्रधान खालिदा जिया यांचे पुत्र तारिक रहमान हे पंतप्रधान आहेत. शेख हसिना आणि तारिक रहमान हे बांगलादेशच्या राजकारणातील कट्टर प्रतिस्पर्धी आहेत. अलिकडेच शेख हसिना यांनी बांगलादेशात परतण्याची घोषणा केली होती. सत्तापालट झाल्यानंतर शेख हसिना यांनी बांगलादेश सोडून भारतात आश्रय घेतला होता. डिसेंबर २०२६ मध्ये बांगलादेशात परतणार असल्याची घोषणा त्यांनी केली होती. मोहम्मद शहाबुद्दीन हे राजीनामा देऊ शकतात, अशी चर्चा बांगलादेशच्या राजकारणात गेल्या काही दिवसांपासून सुरू होती.

या सर्व घडामोडींवर लक्ष ठेवून असणाऱ्या वरिष्ठ सूत्रांनी याबाबत संकेत दिले होते. शहाबुद्दीन हे राष्ट्रपतिपदावरून पायउतार होतील असे त्यांनी सांगितले होते. बंगभवनात वरिष्ठ अधिकाऱ्यांसोबत झालेल्या बैठकीत राष्ट्रपतिपद सोडण्याची तयारी त्यांनी दर्शवली होती. त्यांनी अवामी लीग सरकारच्या कार्यकाळात २४ एप्रिल २०२३ रोजी बांगलादेशच्या २२ वे राष्ट्रपती म्हणून शपथ घेतली होती. त्यांचा कार्यकाळ २०२८ मध्ये संपुष्टात येणार होता. मात्र, कार्यकाळ पूर्ण होण्याआधीच अवघ्या दोन वर्षांच्या आतच त्यांनी राजीनामा दिला आहे.