बांग्लादेशात पुन्हा एकदा हिंसाचार उसळला आहे. निदर्शकांनी देशातील सर्वात मोठ्या वृत्तपत्रांच्या कार्यालयांमध्ये तोडफोड केली आणि त्यांना आग लावली....माजी पंतप्रधान शेख हसीना यांना पदच्युत करणाऱ्या युवा चळवळीतील प्रमुख नेता शरीफ उस्मान हादीच्या हत्येनंतर बांगलादेशात पुन्हा हिंसाचार उफाळून आला आहे. दंगलखोर भारतीय कार्यालयांना मोठ्या प्रमाणावर लक्ष्य करत आहेत. चितगावमधील भारतीय उच्चायुक्तालयावर दगडफेक करण्यात आली आहे. निदर्शकांनी भारतविरोधी घोषणा दिल्या. मैमनसिंह जिल्ह्यात एका हिंदू मजुराची मारहाणा करुन हत्या करण्यात आली.

शरीफ उस्मान हादी हा बांग्लादेशातील विद्यार्थी आंदोलनातील प्रमुख नेता आहे. शेख हसीनाविरोधी विद्यार्थी आणि युवक संघटना ‘इंकलाब मंच’चा प्रमुख नेता आहे. तो या संघटनेचा प्रवक्ताही होता. 2024 मध्ये सरकारविरोधात तरुणाई रस्त्यावर उतरली होती. त्यावेळी हादीने महत्त्वाची भूमिका बजावली होती. या आंदोलनाने तत्कालीन पंतप्रधान शेख हसीना यांच्या सत्तेला थेट आव्हान दिले होते. तो पलटन परिसरातील कल्व्हर्ट रोडवरून ऑटो-रिक्षाने प्रवास करत असताना अज्ञात हल्लेखोरांनी गोळीबार केला. यात तो गंभीर जखमी झाला. अखेर उपचारादरम्यान 18 डिसेंबरला त्याचा मृत्यू झाला.

अवामी लीगच्या कार्यकर्त्यांना खुलेआम हत्येच्या धमक्या दिल्या जात आहेत. ग्रेटर बांग्लादेशचा नकाशा प्रसिद्ध करणाऱ्या उस्मान हादी याच्या हत्येने बांगलादेशमध्ये पुन्हा अशांतता निर्माण झाली आहे. नोव्हेंबरमध्ये माजी पंतप्रधान शेख हसीना यांना मृत्युदंडाची शिक्षा सुनावण्यात आली आहे. 2024 च्या विद्यार्थी चळवळीदरम्यान झालेल्या हत्याकांडांचे सूत्रधार असल्याचा ठपका त्यांच्यावर ठेवण्यात आलाय. सत्ता गेल्यानंतर शेख हसीना भारताच्या आश्रयाला आल्या आहेत. नोबेल पारीतोषिक विजेते अर्थतज्ञ मोहम्मद युनूस यांचं काळजीवाहू सरकार सध्याची परिस्थिती कशी हाताळतं ते पाहणं महत्वाचं आहे.