आसाममधील कामरूप जिल्ह्यात बुधवारी सकाळी रेल्वेचा मोठा अपघात झाला. डिगारू रेल्वे स्थानकाजवळ कोलकाता-सैरंग एक्सप्रेसचे इंजिन आणि पाच डबे रुळावरून घसरले. या अपघातात सुमारे ५० प्रवासी जखमी झाल्याची माहिती आहे. याप्रकरणी पोलीस पुढील कारवाई करत आहेत.

मिळालेल्या माहितीनुसार, बुधवारी सकाळी ६ वाजून ५४ मिनिटांच्या सुमारास हा अपघात घडला. कोलकाता-सैरंग एक्सप्रेस (१३१२५) ही ट्रेन डिगारू रेल्वे स्थानकावरून दुसऱ्या रुळावर वळवली जात होती. याच वेळी ट्रेनचा वेग कमी न झाल्याने ती दुसऱ्या रुळावर लावण्यात आलेल्या बॅरिकेड्सला धडकली. या धडकेमुळे ट्रेनचे इंजिन आणि पाच डबे रुळावरून खाली उतरले.

पूर्वोत्तर सीमांत रेल्वेच्या माहितीनुसार, दुसऱ्या ट्रेनला आधी मार्ग देण्याची प्रक्रिया सुरू असताना हा प्रकार घडला. दरम्यान, या अपघाताशी संबंधित एक ४५ सेकंदांचा व्हिडिओ समोर आला आहे. या व्हिडिओमध्ये ट्रेनच्या इंजिनमधील लोको पायलटच्या केबिनचे दृश्य दिसत आहे. त्यामध्ये कंट्रोल पॅनल, डिजिटल स्क्रीन, विविध स्विच आणि इतर उपकरणे पाहायला मिळतात.

व्हिडिओमध्ये लोको पायलटचा आवाजही ऐकू येत आहे. इंजिनमधील कोणतीही यंत्रणा व्यवस्थित काम करत नसल्याचे ते सांगत आहेत. सिग्नलमध्ये बिघाड झाला असून इमर्जन्सी यंत्रणाही काम करत नसल्याचे त्यांच्या बोलण्यातून ऐकायला मिळते. तसेच एस९ आणि ए९ यंत्रणाही बंद असल्याचे ते सांगत आहेत.

अपघाताची माहिती मिळताच रेल्वेचे अधिकारी, कर्मचारी आणि बचाव पथक घटनास्थळी दाखल झाले. त्यांनी डब्यांमध्ये अडकलेल्या प्रवाशांना बाहेर काढले. जखमी प्रवाशांना तातडीने जवळच्या रुग्णालयात उपचारासाठी पाठवण्यात आले. तसेच प्रवाशांचा पुढील प्रवास खोळंबू नये यासाठी रेल्वे प्रशासनाने दुसऱ्या ट्रेनची व्यवस्था केली आहे. या अपघातामुळे रेल्वे प्रवाशांमध्ये भीतीचे वातावरण निर्माण झाले असून अपघाताच्या नेमक्या कारणांचा तपास केला जात आहे.