Turkiye Earthquake News : आशिया आणि युरोपचं प्रवेशद्वार असलेल्या तुर्कीमध्ये पुन्हा एकदा मोठा भूकंप झाल्याची धक्कादायक माहिती समोर आली आहे. सोमवारी (२० फेब्रुवारी) रात्रीच्या सुमारास हे धक्के जाणवले असून नवीन भूकंपामुळे अनेक ठिकाणच्या इमारती कोसळल्या असल्याची माहिती आहे. या भूकंपाची तीव्रता ६.४ रिश्टर स्केल इतकी नोंदवली गेली आहे. (Latest Marathi News)

भूकंपामुळे दक्षिण  तुर्कस्तानच्या काही भागात आणखी हानी होण्याची शक्यता वर्तवण्यात येत आहे. लताकियात सुमारे 10 सेकंद भूकंपाचे दोन भूकंप जाणवले आहेत. यावेळी लोक हॉटेलमधून बाहेर आले आणि बाहेरील मोकळ्या जागी जमा झाले. अनेकांनी मोकळ्या जागी आसरा घेतला. तूर्तास कोणत्याही जीवितहानीचे वृत्त समोर आले नाही.

यूरोपीय भूमध्य भूकंप विज्ञान केंद्राने (EMSC) दिलेल्या माहितीनुसार, या भूकंपाचा केंद्रबिंदू जमिनीपासून १.२ मैल अर्थात जवळपास दोन किलोमीटर खोल आहे. सोमवारी टर्की आणि सीरीया देशाचा सीमाभाग ६.३ रिश्टर स्केल तीव्रतेनं हादरला आहे. या दुर्घटनेत जीवितहानी झाल्याची अद्याप कोणतीही माहिती समोर आली नाही.

अगदी दोन आठवड्यांपूर्वी याच प्रदेशात विनाशकारी आणि प्राणघातक  भूकंपाचे धक्के बसले होते. या भूकंपामध्ये ४५,००० हून अधिक लोक ठार झाले आणि १० लाखाहून अधिक लोक बेघर झाले आहेत. ठिकठिकाणी मोठमोठ्या इमारती कोसळल्या असून अजूनही ढिगाऱ्याखालून नागरिकांना बाहेर काढले जात आहे.

दरम्यान, भूकंपग्रस्त भागात मदतीसाठी भारतासह ८४ देशांच्या पथकांकडून बचावकार्य सुरू आहे. भारताने बचावासाठी NDRF पथकाला तुर्कीमध्ये पाठवलं असून जगभरातून तुर्कीए आणि सीरियाला मदत दिली जात आहे. तुर्कीए आणि सीरियातील भूंकपग्रस्त शहर पुन्हा नव्याने उभी करण्याये आव्हान तुर्कीए सरकारसमोर आहे.

Edited By - Satish Daud