केंद्रीय गृहमंत्री अमित शहा यांनी रविवारी राष्ट्रीय एनडीएबाबत मोठा दावा केला. ते म्हणाले की, ही एनडीए सरकार फक्त आपला हा कार्यकाळ पूर्ण करणार नाही. तर 2029 मध्येही सरकार स्थापन करेल. चंदीगडमधील मनीमाजरा येथे एका कार्यक्रमात बोलताना ते असं म्हणाले आहेत.

ते म्हणाले आहेत की, '''विरोधकांना जे म्हणायचे आहे ते बोलू शकतात, मात्र याची मी तुम्हाला खात्री देऊ इच्छितो की, काळजी करू नका. 2029 मध्येही फक्त एनडीएचीच सत्ता येईल, फक्त नरेंद्र मोदीच येतील.''

अमित शहा म्हणाले, ''विरोधकांना वाटते की, त्यांनी काही प्रमाणात यश मिळवून निवडणुका जिंकल्या आहेत. गेल्या तीन निवडणुकांमध्ये काँग्रेसला जितक्या जागा मिळाल्या आहेत, त्यापेक्षा जास्त जागा या निवडणुकीत भाजपला मिळाल्या आहेत, हे त्यांना माहीत नाही. भाजपकडे त्यांच्या संपूर्ण आघाडीपेक्षा जास्त जागा आहेत.''

अमित शहा म्हणाले, ''मी विरोधी पक्षांना आश्वस्त करू इच्छितो की, हे सरकार फक्त 5 वर्षांचा कार्यकाळ पूर्ण करणार नाही, तर पुढील कार्यकाळही या सरकारचा असेल. विरोधी पक्षाच्या बाकांवर बसण्याची तयारी ठेवा आणि विरोधी पक्षात प्रभावीपणे काम करायला शिका.''

दरम्यान, आज अमित शहा यांनी चंदीगडमधील मणिमाजरा येथे एका प्रकल्पाचे उद्घाटन केले. पंजाबचे राज्यपाल आणि केंद्रशासित प्रदेश चंदीगडचे प्रशासक गुलाब चंद कटारिया यावेळी उपस्थित होते. एकूण 75 कोटी रुपये खर्चून उभारण्यात आलेल्या या प्रकल्पाचा मणिमाजरा येथील 1 लाखाहून अधिक रहिवाशांना फायदा होणार आहे.