America: नव्या वर्षाच्या पहिल्याच दिवशी अमेरिकमध्ये मोठा अपघात झाला आहे. न्यू ऑरलियन्समधील बोर्बन स्ट्रीटवरच्या गर्दीत एकाने ट्रक घुसवला. वेगाने आलेल्या ट्रकच्या खाली अनेकजण चिरडले गेले. त्यापैकी १० जणांचा मृत्यू झाला असून ३० हून अधिक नागरिक जखमी झाल्याची माहिती समोर आली आहे. न्यू ऑरलियन्सच्या महापौर लटोया कँटरेल यांनी हा दहशतवादी हल्ला असल्याचे विधान केले आहे.

न्यू ऑरलियन्सच्या पोलिसांनी दिलेल्या माहितीनुसार, ही घटना पहाटे ३.१५ च्या सुमारास घडली. परिसरात न्यू इयर सेलिब्रेशन संपत आले होते. नव्या वर्षाच्या स्वागतासाठी रस्त्यावर गर्दी झाली होती. या गर्दीत एक ट्रक घुसला आणि त्याने गर्दीतील लोकांना चिरडले. यामध्ये १० नागरिकांचा मृत्यू झाला, तर ३० नागरिक जखमी झाले आहेत.

ट्रकचा अपघात झाल्यानंतर त्याच्या चालकाने गोळीबार करायचा प्रयत्न केला. त्याला स्थानिक पोलिसांनी प्रत्युत्तर दिले. या गोळीबारामध्ये दोन पोलीस कर्मचारी गंभीररित्या जखमी झाले. त्यांना लगेचच रुग्णालयात नेण्यात आले. ते आता सुखरुप असल्याचेही पोलिसांनी माध्यमांना सांगितले.

पहाटे तीनच्या सुमारास हा अपघात घडला. अमेरिकेतील न्यू ऑरलियन्सचा परिसर नाइट लाइफसाठी लोकप्रिय आहे. त्यामुळे नववर्षाच्या स्वागतासाठी असंख्य लोक जमले होते. तेव्हाच हा भीषण अपघात झाला. ही घटना घातपाताचा प्रयत्न असल्याची शक्यता न्यू ऑरलियन्सच्या महापौर लटोया कँटरेल यांनी व्यक्त केली आहे. त्यांनी हा अपघात 'दहशतवादी हल्ला' आहे असे म्हटले आहे.