Shocking News : अखिल भारतीय आयुर्विज्ञान संस्था (एम्स) पटनामध्ये काम करणाऱ्या एका नर्सच्या दोन निष्पाप मुलांना जिवंत जाळल्याची धक्कादायक माहिती समोर आली आहे. बिहारची राजधानी असलेल्या पटना येथील जानीपूर पोलीस ठाण्याच्या परिसरात ही भयंकर घटना घडली आहे. या घटनेमुळे आसपास खळबळ उडाली आहे.

आगीमध्ये मृत्युमुखी पडलेल्या मुलांची ओळख अंजली आणि अंशी अशी झाली आहे. ही दोन्ही मुले जानीपूर येथे राहणाऱ्या शोभा देवी गुप्ता आणि ललन कुमार गुप्ता यांची अपत्ये होती. मुले शाळेतून घरी परतत असताना ही घृणास्पद घटना घडल्याचे म्हटले जात आहे. शोभा देवी या एम्स पटनामध्ये नर्स म्हणून कार्यरत आहेत.

प्राथमिक माहितीनुसार, दोन्ही मुले शाळेतून घरी आल्यानंतर काही गुंड त्यांच्या घरात घुसले. गुंडांनी दोन्ही मुलांना पेटवून दिले. आगीमुळे मुलांचा जळून घरातच मृत्यू झाला. घटनेची माहिती मिळताच स्थानिक पोलिसांनी घटनास्थळी पोहोचून प्रकरणाचा सखोल तपास सुरू केला आहे. मृत्यूमागील नेमके कारण अद्याप समोर आलेले नाही.

या घटनेचे सोशल मीडियावर काही व्हिडीओ व्हायरल होत आहे. या व्हिडीओमध्ये बेडवर पडलेला मुलाचा जळालेला मृतदेह दिसतो, त्याच्या तोंडावर कपडा बांधलेला असल्याचे पाहायला मिळते. एम्समध्ये नर्स असलेल्या शोभा देवी गुप्ता या घराच्या दरवाजावर मुलाच्या मृतदेहाजवळ रडत बसल्या आहेत, त्यांचे शेजारी सांत्वन करत आहेत, असे व्हिडीओत दिसते.