अभिजित दिपकेंचं ठरलं. देशभरातून छत्रपती संभाजीनगर मध्ये आलेल्या कॉक्रोच जनता पार्टीच्या पदाधिकाऱ्यांनी सध्या 2 दिवसांचा कॉक्रोच कॉन्क्लेव घेत सीजेपीचा रोडमॅप ठरवणार आहेत. नीट पेपरफुटीनंतर मोदी सरकार विरोधात देशभरात जोरदार आंदोलन उभारून शिक्षणमंत्र्यांचा राजीनामा घेतल्यानंतर आता दिपकेनीं नवी राजकीय गुगली टाकलीये. आता देशाला नव्या पक्षाची नाही तर सरकारवर दबाव गटाची गरज असल्याचं कॉक्रोच जनता पार्टीचे संस्थापक अभिजित दिपकेंनी म्हटलंय.
देशाला अभिजित दिपकेंच्या रुपानं एक नवा राजकीय चेहरा मिळतोय असं वाटत असतानाच, दिपकेंच्या या घोषणेनं चित्र स्पष्ट केलंय. कॉक्रोच जनता पार्टी हा सध्या तरी निवडणूक लढवणारा राजकीय पक्ष असणार नाही. दिपकेंच्या या भूमिकेमुळे प्रस्थापित राजकीय पक्षांचा जीव भांड्यात पडला असला, तरी सत्ताधाऱ्यांची धाकधूक मात्र वाढलीय. कारण, सत्ता कोणाचीही असो, सरकारला नमवायचं असेल, तर दबावगट कसा प्रभावी ठरतो याची इतिहासात अनेक उदाहरणं आहेत.
मराठा क्रांती मोर्चा
भारतीय किसान युनियन
संयुक्त किसान मोर्चा
भारतीय मजदूर संघ
इंडियन मेडिकल असोसिएशन (IMA)
या दबावगटांनी वेळोवेळी रस्त्यावर उतरून सरकारला आपल्या मागण्या मान्य करायला भाग पाडलंय. पण नाण्याच्या दुसऱ्या बाजूचा इतिहास सांगतो की, देशात दबावगट म्हणून जन्माला आलेल्या अनेक चळवळींचा प्रवास पुढे राजकीय पक्षापर्यंत येऊन पोहचलाय. त्याची सर्वात बोलकी उदाहरणं म्हणजे...
शिवसेना
मराठी माणसाच्या हक्कासाठी संघटना म्हणून सुरू झालेल्या चळवळीने, वर्षभरातच राजकीय मैदानात उतरून राजकीय पक्षाचं रूप घेतलं.
संपूर्ण क्रांती ते जनता पार्टी
इंदिरा गांधींच्या आणीबाणीविरोधात जयप्रकाश नारायणांनी पेटवलेली संपूर्ण क्रांती पुढे जनता पार्टी बनून सत्तेवर आली.
स्वाभिमानी शेतकरी संघटना
राजू शेट्टींनी शेतकऱ्यांच्या प्रश्नांसाठी उभारलेला दबावगट पुढे थेट निवडणूक लढवणारा पक्ष बनला
इंडिया अगेन्स्ट करप्शन ते आम आदमी पार्टी
अण्णा हजारेंनी लोकपाल आंदोलन हा एक अतिशय मजबूत दबावगट तयार केला, सरकारनं कायदा बनवल्यानंतर अरविंद केजरीवालांनी आम आदमी पक्षाची स्थापना केली
आंदोलनातून उगम आणि सत्तेत सहभाग... हा दबावगटांचा आजवरचा इतिहास राहिलाय! जनाधार वाढला, की लोकांच्या अपेक्षा वाढतात आणि याच अपेक्षा पूर्ण करण्यासाठी शेवटी राजकीय भूमिका घेऊन सत्तेचाच मार्ग निवडावा लागतो, हेच आजवर सिद्ध झालंय. त्यामुळे आज जरी अभिजित दिपकेंची कॉक्रोच जनता पार्टी सत्ताधारी आणि विरोधकांवर अंकुश ठेवणारा दबावगट असण्याचा दावा करत असली... तरी आजचा दबावगट, उद्याचा राजकीय पक्ष बनला आणि उद्या दिपके निवडणुकीच्या रिंगणात उतरले... तर नवल वाटायला नको!
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.