नवी दिल्ली: जपानचे माजी पंतप्रधान शिंजो आबे यांच्या मृत्यूबद्दल भारताचे पंतप्रधान नरेंद्र मोदी यांनी शोक व्यक्त केला आहे. आमच्या सर्वात जवळच्या मित्रांपैकी एक असलेल्या शिंजो आबे यांच्या निधनानं स्तब्ध आणि दुःखी झालो आहे. ते एक महान वैश्विक नेते, उल्लेखनीय प्रशासक होते. त्यांनी जपान आणि विश्वाला एक उत्तम स्थान मिळवून देण्यासाठी संपूर्ण आयुष्य समर्पित केले, अशा शब्दांत मोदी यांनी आबे यांना श्रद्धांजली वाहिली. तसेच उद्या म्हणजेच ९ जुलै रोजी देशात राष्ट्रीय दुखवटा जाहीर करण्यात आला आहे.

पंतप्रधान नरेंद्र मोदी (Narendra Modi) म्हणाले, की 'शिंजो आबे यांच्यासोबत माझा अनेक वर्षांपासूनचा स्नेह होता. गुजरातचा मुख्यमंत्री असल्यापासून माझा आणि त्यांचा परिचय होता. पंतप्रधान झाल्यानंतर आमची मैत्री पुढेही कायम राहिली. अर्थव्यवस्था आणि जागतिक घडामोडींविषयीच्या त्यांच्या दृष्टीकोनाने माझ्यावर कायमच प्रभाव राहिला. अलीकडेच जपान दौऱ्यावेळी शिंजो आबे (Shinzo Abe) यांची भेट घेण्याची, तसेच अनेक महत्वाच्या मुद्द्यांवर चर्चा करण्याची मला संधी मिळाली होती. ती माझी अखेरची भेट ठरेल हे माझ्या ध्यानीमनीही नव्हते. त्यांच्या कुटुंबीयांप्रती आणि जपानी नागरिकांबद्दल मी सहवेदना व्यक्त करतो.'

भारतात उद्या एका दिवसाचा राष्ट्रीय दुखवटा

शिंजो आबे यांनी भारत-जपान या दोन देशांमधील संबंध वैश्विक पातळीवर वाढवण्यात मोठे योगदान दिले आहे. आज संपूर्ण देश (India) जपानच्या दुःखात सहभागी आहे. शिंजो आबे यांच्याबद्दल आदर व्यक्त करण्यासाठी उद्या, ९ जुलै रोजी देशात एका दिवसाचा राष्ट्रीय दुखवटा पाळण्यात येणार आहे, असे मोदी यांनी ट्विटमध्ये म्हटलं आहे. शिंजो आबे हे शुक्रवारी पश्चिम भागात निवडणूक प्रचार रॅलीला संबोधित करत असतानाच, त्यांच्यावर हल्लेखोरानं गोळ्या झाडल्या. यात ते गंभीर जखमी झाले होते. त्यांना तातडीने रुग्णालयात दाखल करण्यात आले होते. उपचारादरम्यान त्यांचा मृत्यू झाला.

Edited By - Nandkumar Joshi