दहावीत शिकणाऱ्या १५ वर्षीय मुलीनं २० व्या मजल्यावरून उडी घेत आत्महत्या केली आहे. परीक्षेदरम्यान आईने मोबाईल फोन वापरण्यास मनाई केल्यामुळे तिने टोकाचे पाऊल उचलले आहे. ही धक्कादायक घटना बेंगळुरूमधील कडूगोडी पोलीस स्टेशन परिसरात घँडली आहे. या धक्कादायक घटनेनंतर परिसरात खळबळ उडाली आहे.

अवंतिका चौरसिया ही १५ वर्षांची मुलगी होती. ती व्हाईटफील्ड परिसरातील सीबीएसई शाळेत शिकत होती. अवंतिकाचं हे दहावीचं वर्ष होतं. पोलिसांनी दिलेल्या माहितीनुसार, १५ फेब्रुवारीपासून वार्षिक परीक्षा सुरू होणार होत्या. त्यामुळे अवंतिकाच्या आईनं तिला मोबाईल वापरण्यास मनाई केली होती. याच कारणामुळे संतापून अवंतिकाने २० व्या मजल्यावरून उडी घेत आत्महत्या केल्याचा संशय पोलिसांना आहे.

या घटनेची माहिती पोलिसांना मिळाल्यानंतर त्यांनी तातडीने घटनास्थळी धाव घेतली. कडूगोडी पोलीस ठाण्यात पोलिसांनी तक्रार दाखल केली. तसेच अवंतिकाच्या आई वडिलांचा जबाब नोंदवून घेतला. या धक्कादायक घटनेनंतर परिसरात खळबळ उडाली असून, या प्रकरणी पुढील तपास पोलीस करीत आहेत.

या प्रकरणी कडूगोडी पोलीस ठाण्यातील पोलीस अधिकारी म्हणाले, ही घटना अत्यंत दु:खद आहे. मुलांवरील अभ्यासाचा दबाव आणि मोबाईल फोनच्या क्रेझमुळे मानसिक स्थिती काही मुलांची मानसिक स्थिती बिघडत चालली आहे. त्यामुळे पालकांनी मुलांसोबत प्रेमाने बोलावे. मुलांना समजावून गोष्टी सांगा. मुलांच्या मनावर कोणताही वाईट परिणाम होणार नाही याची काळजी घेणं गरजेचं असल्याचंही पोलीस अधिकारी म्हणाले.