संजय गडदे, साम प्रतिनिधी

मुंबईच्या गोरेगाव येथील नेस्कोमध्ये झालेल्या नवरात्री दांडिया महोत्सवात मारहाणीची घटना घडलीय. एका १९ वर्षीय जेनिल बारबया नावाच्या तरुणाला काही उपद्रवी तरुणांनी बेदम मारहाण केली. या हल्ल्यात जेनिल बारबयच्या डोक्याला गंभीर दुखापत झालीय. त्याला मलाड (पश्चिम) येथील तुंगा रुग्णालयात दाखल करण्यात आले आहे.

बुधवारी रात्री झालेल्या या घटनेत पोलिसांनी तिघा तरुणांना ताब्यात घेतले होते. मात्र उपलब्ध माहितीनुसार हे आरोपी पोलिसांच्या व्हॅनमधून पसार झालेत. अधिक मिळालेल्या माहितीनुसार, नेस्को येथे पावसामुळे मोठी गर्दी झाली होती. दांडिया खेळताना एका उपद्रवी तरुणाने जेनिलला धक्का दिला, त्यावर प्रश्न विचारल्यामुळे भांडण उफाळले व जमावाने त्याला मारहाण केली असं सांगण्यत येत आहे.

नवरात्र उत्सवात दांडिया, गरबा खेळला जातो. मूळचा गुजरातचा असणारा दांडीया हा आता महाराष्ट्रातही चांगलाच रुजलाय. मात्र या दांडिया महोत्सावात काही अनुचित घटना देखील घडतात. मुंबईतील गोरेगावातील नेस्को दांडिया महोत्सवात एका तरुणाला जमावाने बेदम मारहाण केलीय. धक्का लागल्याचं कारण विचारल्यानंतर जमावने त्याला घेरत जबर मारहाण केली. याप्रकरणी गोरेगावमधील वनराई पोलीस ठाण्यात तक्रार करण्यात आलीय. विशेष म्हणजे मारहाण करणारे काहीजण पोलीस व्हॅनमधून पसार झालेत.