Maval News : मावळात पावसाचा जोर कमी झाला आहे. तरी तालुक्यातील सिंचन आणि पिण्यासाठी लागणारे पाणी धरणात मुबलक उपलब्ध असल्याने वर्षभराची चिंता मिटली आहे. सध्या पवना धरणात 89.82 टक्के पाणीसाठा आहे. दरम्यान पुणे जिल्ह्यातील चारही धरणांत मागील 15 दिवसांपासून चांगला पाणीसाठा जमा झाला आहे. (Maharashtra News)

पवना धरणात (pavana dam) गतवर्षी आजच्या तारखेला 81.30 टक्के इतका पाणीसाठा शिल्लक होता. यंदा 89.82 टक्के पाणीसाठा झाला आहे. पवना धरणात गत 24 तासांत 1.84 टक्क्यांनी वाढ झाली आहे. दरम्यान नव्वद टक्के धरणात पाणीसाठा झाल्याने धरणाचे दरवाजे कधीही उघडून पाणी सोडले जाण्याची शक्यता आहे. पवना नदीकाठी असणाऱ्या सर्व नागरिकांना प्रशासनाकडून सतर्कतेचा इशारा देण्यात आला आहे.

पुणे जिल्ह्यातील 4 धरणांत (Pune Dam Water Level) मागील 15 दिवसांपासून चांगला पाणीसाठा जमा झालेला आहे. खडकवासला, पानशेत, वरसगाव, टेमघर धरणांत एकुण 21.34 टीएमसी एवढं पाणी जमा झालं आहे.

यामुळे आता शेतीच्या पाण्याची आणि पिण्याच्या पाण्याची चिंता मिटली आहे. एकुण 81.21 टक्के इतका पाणीसाठा सद्यस्थितीला जमा झाला आहे.

Edited By : Siddharth Latkar