संघर्ष गांगुर्डे, कल्याण- डोंबिवली

डोंबिवलीत दारू पिऊन धिंगाणा घालणाऱ्यांच्या घटना सतत समोर येत आहेत. अशातच काल रात्री एक मद्यपी खिडकीबाहेर लटकत असल्याचा व्हिडिओ समोर आला आहे. सुदैवाने या थरकाप उडवणाऱ्या घटनेत कोणतीही जीवित हानी झालेली नसून नागरिकांनी तातडीने अशा मद्यपींवर कारवाई करण्याची मागणी केली आहे. दरम्यान या घटनेचा व्हिडिओ सोशल मीडियावर व्हायरल होत आहे.

मिळालेल्या माहितीनुसार, सदर घटना ही डोंबिवलीतील नेमाडे परिसरात घडली आहे. संबंधित इसम काल रात्रीच्या सुमारास भरपूर प्रमाणात दारू पिऊन होता. नेमाडे परिसरातील एका इमारतीच्या चौथ्या मजल्यावरील खिडकीत दारूच्या झिंगेत तोल जाऊन तो बाहेर लटकला. सुदैवाने या घटनेत कोणतीही जीवितहानी झाली नाही. मात्र मद्यपानाच्या अतिसेवनामुळे किती गंभीर प्रसंग ओढवू शकतात, याचे हे जिवंत उदाहरण असल्याची चर्चा नागरिकांत होत आहे.

व्हायरल झालेल्या व्हिडिओनुसार, एक तरुण इमारतीच्या चौथ्या मजल्यावरील खिडकीवर लटकला आहे. या तरुणाने दारू पिल्यामुळे त्याचा तोल जात असल्याचे म्हटले आहे. हा तरुण सर्वात आधी खिडकीत बसला. नंतर तो खिडकीत उभा राहून काहीतरी बडबडू लागला.

तरुणाचा सतत तोल जात होता. तरीही तो स्टंट करतच राहिला. दरम्यान रस्त्यावरून येणाऱ्या जाणाऱ्यांनी हा प्रकार पहिला. क्षणात या मद्यपीच्या गोंधळाने आजूबाजूचे नागरिक घटनास्थळी जमले. आणि मोबाईल काढून घडत असलेली घटना मोबाईल कॅमेऱ्यात कैद केली. व्हायरल झालेल्या व्हिडिओमुळे पुन्हा एकदा सार्वजनिक ठिकाणी मद्यपान आणि सुरक्षिततेचा प्रश्न ऐरणीवर आला आहे.