Kandivali News

वसई येथील प्रादेशिक परिवहन कार्यालयाचा अजब कारभार उघडकीस आला आहे. उमेदवाराच्या जन्म तारखेच्या एक वर्ष आधीच त्याला वाहन परवाना दिल्याची तारीख नमूद करण्यात आली आहे. त्यामुळे जन्मापूर्वीच तरुणाला वाहन परवाना मिळाल्याचा हास्यास्पद प्रकार घडला आहे. त्यामुळे सरकारी कर्मचाऱ्यांचा चुकांचा भुर्दंड सामान्य नागरिकांना सहन करावा लागत आहे.

महाराष्ट्र शासनाच्या परिवहन विभागातील वाहन आणि सारथी प्रणालीत ऑनलाईन स्वरूपात अर्ज दाखल करून कामे केली जात आहेत. वाहन प्रणालीत वाहनांच्या संदर्भातील विविध कामे; तर सारथी प्रणालीत परवान्याची कामे केली जात आहेत. परवान्याबाबत ऑनलाईन प्रणालीत डाटा अद्ययावत करत असताना अनेक जणाच्या परवान्यात बदल झालेले दिसून येत आहेत. फोटो बदली होणे, लिंग बदल झालेले आहेत. याची दुरुस्ती करण्यासाठी नागरिकांचा आर्थिक फटका बसत आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

वसई परिक्षेत्रातील वाहन परवानाधारक किशोर पवार यांच्या परवान्यावर २१ जानेवारी १९८७ अशी तारीख लिहिण्यात आली आहे. हास्यास्पद बाब म्हणजे त्याखाली पवार याची जन्मतारीख ९ ऑगस्ट १९८८ अशी नमूद करण्यात आली आहे. त्यामुळे किशोर पवारचा जन्म होण्यापूर्वीच त्याला वाहन परवाना दिल्याचा प्रकार घडला आहे. परिवहन विभागातील कर्मचाऱ्यांच्या चुकीचा फटका तरुणाला बसला आहे. ही दुरुस्ती करण्यासाठी पुन्हा त्याला आर्थिक भुर्दंड बसणार आहे.