मुंबई : लोकसभा निवडणुकीच्या पाचव्या टप्प्याचा आज प्रचाराचा शेवटचा दिवस आहे. या पार्श्वभूमीवर महाविकास आघाडीने संयुक्त पत्रकार परिषद घेतली. या पत्रकार परिषदेत उद्धव ठाकरेंनी पंतप्रधान मोदींच्या टीकेला प्रत्युत्तर दिलं. यावेळी त्यांनी जेपी नड्डा यांच्या राष्ट्रीय स्वयंसेवक संघावरील वक्तव्याचाही समाचार घेतला. 'आता आरएसएसला नकली म्हणणं बाकी आहे. भाजप आरएसएसवर बंदी आणेल, असं म्हणत उद्धव ठाकरे यांनी टीका केली.

काल शिवाजीपार्कवर महायुतीची जाहीर सभा झाली. या सभेत पंतप्रधान नरेंद्र मोदींनी महाविकास आघाडी आणि उद्धव ठाकरेंवर टीका केली. तर मोदींनी उद्धव ठाकरेंचा नकली संतान असा उल्लेख केला. 'इंडिया आघाडीचे सरकार आल्यास राम मंदिरवर बुलडोझर फिरवतील,अशी टीका केली. तर जेपी नड्डा यांनी आम्ही आधीपेक्षा सक्षम झालो असून स्वत:च स्वत: चालवू शकतो, असं आरएसएसच्या प्रश्नावर वक्तव्य केलं. या सर्वांचा समाचार उद्धव ठाकरेंनी पत्रकार परिषदेत घेतला.

सत्ताधाऱ्यांवर टीका करताना उद्धव ठाकरे म्हणाले, 'भाजपच्या मनात पाकिस्तान आहे. त्यांना अजून शरीफ यांचा केक आठवत आहे. केवळ निवडणूक जिंकण्यासाठी पुलवामाचा हल्ला घडवून आणला का, असा प्रश्न उपस्थित व्हायला जागा आहे'.

'नकली संतान'च्या टीकेला प्रत्युत्तर देताना ठाकरे म्हणाले, 'आता राष्ट्रीय स्वयंसेवक संघाला नकली म्हणणं बाकी आहे. भाजप आरएसएसवर बंदी आणेल. कालच्या सभेत जे लोक आले होते, त्यांनी आपली दिशा ठरवावी. मोदींनी मला पण नकली संतान म्हटलं आहे. आमचं सरकार आल्यास आम्ही राम मंदिराच काम पूर्ण करू'.

उद्धव ठाकरेंचा गंभीर आरोप

'आता ५० खोके फुटले आहेत. त्याचं आता वाटप सुरु आहे. जिथे मतदान कमी होणार आहे. तिथे लोकांच्या बोटांना आधीच शाई लावणं सुरू आहे. या अर्थ तिथे मतदान करता येणार नाही, असा मोठा आरोप ठाकरेंनी केला.