संघर्ष गांगुर्डे, साम टिव्ही

टिटवाळा - गोवेली रस्ता परिसरातील घोटसई फाट्याजवळ भीषण अपघाताची घटना घडली आहे. भरधाव पिकअप टेम्पोने महिलेला चिरडले. महिला फाट्याजवळून जात होती. यादरम्यान, भरधाव पिकअप टेम्पोने महिलेला चिरडले. हा संपूर्ण प्रकार सीसीटीव्ही कॅमेऱ्यात कैद झाला आहे. व्हिडिओमध्ये हा अपघात नेमका कसा घडला? हे स्पष्टपणे दिसून येत आहे. घटनेनंतर परिसरात एकच खळबळ उडाली आहे.

सुरेखा खंडागळे असे मृत महिलेचं नाव आहे. त्या टिटवाळा येथील रहिवासी असल्याची माहिती आहे. हा भीषण अपघात टिटवाळा–गोवेली रस्ता जवळील घोटसई फाट्याजवळ घडला आहे. मिळालेल्या माहितीनुसार, सुरेखा खंडागळे या रस्त्याने पायी जात असताना अचानक वेगात आलेल्या पिकअप टेम्पोने त्यांना जोरदार धडक दिली.

धडकेनंतर महिला रस्त्यावर पडली असताना टेम्पो त्यांच्या अंगावरून गेल्याने हा अपघात अत्यंत भीषण ठरला. ही संपूर्ण घटना परिसरातील CCTV कॅमेऱ्यात कैद झाली असून, व्हिडिओमध्ये अपघाताची थरारक दृश्ये स्पष्टपणे दिसत आहेत. घटनेनंतर परिसरात एकच खळबळ उडाली.

अपघाताची माहिती मिळताच पोलीस घटनास्थळी दाखल झाले. मृतदेह ताब्यात घेऊन शवविच्छेदनासाठी पाठवण्यात आला आहे. पिकअप टेम्पो चालकाविरोधात गुन्हा दाखल करण्याची प्रक्रिया सुरू असून, पुढील तपास पोलीस करत आहेत.

दरम्यान, या मार्गावरून भरधाव वाहने चालवली जात असल्याने अपघातांचे प्रमाण वाढले असून, स्थानिक नागरिकांनी वेगमर्यादा, स्पीड ब्रेकर आणि पोलीस बंदोबस्त वाढवण्याची मागणी केली आहे.