विकास काटे, साम टीव्ही, प्रतिनिधी

Thane Crime : ठाण्यातील वागळे इस्टेट परिसरात एकनाथ शिंदे यांच्या शिवसेनेच्या शाखाप्रमुखाने किरकोळ कारणावरुन तलवार उपसून दमदाटी करण्याचा प्रयत्न केला. पार्किंगच्या वादातून शिंदेसेनेच्या कार्यकर्त्याने तलवार उपसल्याचे समोर आले आहे. या घटनेचा व्हिडीओ सोशल मीडियावर व्हायरल झाला आहे. या प्रकरणी पोलिसांनी दोघांना ताब्यात घेतले आहे.

मिळालेल्या माहितीनुसार, ठाण्याच्या वागळे इस्टेट परिसरात आकाश भालेराव आणि सूरज हजारे हे दोन युवक तलवार घेऊन दमदाटी करत होते. हे उपमुख्यमंत्री एकनाथ शिंदे यांच्या शिवसेना पक्षातील कार्यकर्ते असल्याची माहिती समोर आली आहे. तलवार दाखवून दहशत माजवण्याचा प्रयत्न करणाऱ्या या दोन्ही युवकांना ठाणे पोलिसांनी ताब्यात घेतले आहे.

तलवार दाखवत गुंडगिरी करणारा आकाश भालेराव हा शिंदेसेनेचा शाखा प्रमुख आहे. दोघेही वागळे इस्टेट पोलीस स्टेशनच्या हद्दीतील साठे नगर येथील रहिवासी आहेत. आकाश आणि सूरज यांचा तलवार दाखवत एका माणसावर हल्ला करतानाचा व्हिडीओ सोशल मीडियावर व्हायरल झाला. त्यानंतर पोलिसांनी या दोघांवर कारवाई केली.

पोलिसांनी दिलेल्या माहितीनुसार, वागळे इस्टेट पी.ओ.एस.गु.आर.क्रमांक ५३३/२०२५ आयपीसी कलम १०९, ३(५), आयपीसी कलम ४, २५, महाराष्ट्र पोलिस कायदा कलम ३७(१), १३५, रोजगार प्रतिबंधक कायदा कलम ७ अंतर्गत आरोपी आकाश आनंद भालेराव (वय २५ वर्षे) आणि आरोपी सूरज दत्ता हजारे (वय २६ वर्षे) यांना २३ जुलै २०२५ रोजी वागळे इस्टेट येथील रोड क्रमांक २५ येथून गुन्हे शाखा युनिट ५ ने ताब्यात घेतले आहे.