Thane Gaodevi vegetable market fire death Toll : ठाण्यातील प्रसिद्ध गावदेवी भाजी मार्केटमध्ये आज (२१ मे) पहाटे अत्यंत भीषण आग लागल्याची धक्कादायक घटना घडली. या दुर्दैवी घटनेत आग विझवताना अग्निशमन दलाच्या एका वरिष्ठ अधिकाऱ्यासह ठाणे महानगरपालिकेच्या आरक्षकाचा मृत्यू झाला आहे. तर दोन अग्निशमन जवान गंभीर जखमी झाले आहेत. त्यांच्यावर रुग्णालयात उपचार सुरू आहेत.

आगीवर नियंत्रण मिळवण्यासाठी अग्निशमन दलाची ५ मुख्य फायर वाहने, ३ जम्बो वॉटर टँकर, २ इतर वॉटर टँकर, ४ रेस्क्यू वाहने, ठाणे आपत्ती प्रतिसाद दलाचे (TDRF) जवान आणि आपत्ती व्यवस्थापन कक्षाचे कर्मचारी युद्धपातळीवर प्रयत्न करत आहेत. तसेच घटनास्थळी ३ टीएमसी रुग्णवाहिका आणि १०८ रुग्णवाहिका सज्ज ठेवण्यात आल्या आहेत. नौपाडा पोलीस आणि महावितरणचे कर्मचारीही परिस्थितीवर लक्ष ठेवून आहेत. आगीचे नेमके कारण अद्याप स्पष्ट झालेले नाही.

पहाटे लागली आग

मिळालेल्या माहितीनुसार, नौपाडा येथील गोखले रोडवर असलेल्या गावदेवी भाजी मार्केटच्या इमारतीला पहाटे ३:४३ वाजताच्या सुमारास अचानक आग लागली. स्थानिक माजी नगरसेवक संजय वाघुले यांनी तात्काळ या घटनेची माहिती ठाणे महानगरपालिकेच्या आपत्ती व्यवस्थापन कक्षाला दिली. त्यानंतर अग्निशमन दलाने घटनास्थळावर धाव घेतली. ७ ते ८ गाड्या आग विझवण्यासाठी पोहचल्या होत्या. पण कर्तव्यावर असतानाच अग्निशमन अधिकाऱ्याचा मृत्यू झाला.

मृतांमध्ये अग्निशमन अधिकाऱ्याचा समावेश

आग एवढी भीषण होती की, ती विझवताना मोठा अनर्थ घडला. या घटनेत ठाणे महानगरपालिका अग्निशमन दलाचे स्थानक अधिकारी सागर शिंदे (वय ४३ वर्षे) आणि महापालिका आरक्षक काळू शंकर गाडेकर (वय ५३ वर्षे) या दोघांचा होरपळून दुर्दैवी मृत्यू झाला. कर्तव्य बजावताना अग्निशमन अधिकाऱ्याचा मृत्यू झाल्याने ठाण्यात हळहळ व्यक्त होत आहे.

दोन जवान जखमी, कळवा रुग्णालयात उपचार सुरू

आग विझवताना अग्निशमन दलाचे स्थानक अधिकारी सुजित पष्टे (वय ४५ वर्षे) आणि तांडेल समीर जाधव (वय ४० वर्षे) हे दोन जवान गंभीर जखमी झाले आहेत. त्यांना तात्काळ उपचारासाठी कळवा येथील छत्रपती शिवाजी महाराज रुग्णालयात दाखल करण्यात आले आहे. त्यांच्यावर वैद्यकीय पथकाकडून उपचार सुरू आहेत.

प्रशासनाची मोठी फौज घटनास्थळी दाखल

घटनेचे गांभीर्य लक्षात घेऊन ठाणे महानगरपालिकेचे अतिरिक्त आयुक्त रोडे, उपायुक्त जी. जी. गोदेपुरे, दिनेश तायडे, श्रीमती मिताली मॅडम, मुख्य अग्निशमन अधिकारी झळके आणि आपत्ती व्यवस्थापन अधिकारी एस. वाय. तडवी यांच्यासह वरिष्ठ अधिकाऱ्यांनी घटनास्थळी धाव घेतली.