ठाकरे गटाच्या नेत्या आणि माजी नगरसेविका तेजस्वी घोसाळकर यांनी ठाकरे गटाला रामराम ठोकला. त्यांनी सर्व पदांचा राजीनामा पक्षप्रमुख उद्धव ठाकरे यांच्याकडे सोपवला. स्थानिक नेतृत्वावरील नाराजीतून त्यांनी राजीनामा दिल्या असल्याचे बोलले जात आहे. मुंबई महानगर पालिका निवडणुकीच्या तोंडावर तेजस्वी घोसाळकर यांनी राजीनामा दिल्यामुळे ठाकरे गटाला मोठा धक्का बसला. सर्व पदाचा राजीनामा दिल्यानंतर आज तेजस्वी घोसाळकर यांनी उद्धव ठाकरे यांची भेट घेतली. यावेळी त्यांच्याकडून तेजस्वी घोसाळकर यांची समजूत काढण्याचा प्रयत्न करण्यात आला.

तेजस्वी घोसाळकर यांनी माध्यमांशी बोलताना सांगितले की, 'मी माझे प्रश्न त्यांच्यासमोर मांडले आहेत. त्यांच्या उत्तराची मी वाट पाहत आहे. उद्धव ठाकरेंसोबत मी बोलणं केलं आणि माझी नाराजी मी सांगितली. मला हिच अपेक्षा आहे की मला न्याय मिळावा आणि त्यांनी निर्णय लवकर घ्यावा. मला आता काहीच बोलायचे नाही. मी उद्धव ठाकरे यांच्या निर्णयाची वाट पाहत आहे. माझी नाराजी दूर झाली की नाही हे लवकरच समजेल.'

आगामी मुंबई महानगर पालिका निवडणुकीच्या तोंडावर उत्तर मुंबईतील स्थानिक विभाग प्रमुख आणि विभाग संघटक यांच्याबद्दल तेजस्वी घोसाळकर यांनी नाराजी व्यक्त केली. त्यानंतर त्यांनी ठाकरे गटाच्या सर्व पदांचा राजीनामा दिला. तेजस्वी घोसाळकर यांनी वारंवार नाराजी व्यक्त करून देखील पक्षाकडून योग्य तो निर्णय घेण्यात आला नाही आणि दखल घेण्यात आली नाही त्यामुळे त्यांनी राजीनामा दिला.

तेजस्वी घोसाळकर यांनी राजीनामा दिल्यानंतर ठाकरे गटाला मोठा धक्का बसला. त्यानंतर तेजस्वी घोसाळकर यांना मातोश्रीवर बोलावण्यात आले होते. त्यानुसार त्यांनी आज उद्धव ठाकरे यांची भेट घेतली. आता या भेटीनंतर तेजस्वी घोसाळकर नेमका काय निर्णय घेणार तसंच ते राजीनामा मागे घेणार की नाही? याकडे सर्वांचे लक्ष लागले आहे.