अभिजित देशमुख, कल्याण

Kalyan News:

कल्याणमध्ये साप मानवी वस्तीत शिरण्याच्या घटना वाढत आहेत. त्यात अजून एक धक्कादायक घटना घडलीये. कल्याणमधील पौर्णिमा टॉकीजजवळ असलेल्या सिद्धिविनायक हॉस्पिटलच्या आयसीयुमध्ये साप शिरला. हॉस्पिटलमध्ये साप शिरल्याने रुग्णांची एकच खळबळ उडाली. ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

हॉस्पिटलमधील एका कर्मचाऱ्याला ऑक्सिजन सिलेंडरवर साप दिसला. आयसीयूमध्ये रुग्ण असल्याने एकच धावपळ उडाली. हॉस्पिटलमधील कर्मचाऱ्यांनी याबाबत वॉर फाउंडेशनला माहिती दिली. प्रेम आहेर व अक्षय वेखंडे यांनी हॉस्पिटलमध्ये जाऊन कोणत्याही रुग्णाला इजा न पोहचून देता सापाचा सुखरूप बचाव केला.

दरम्यान, पकडलेला साप हा धामण जातीचा बिनविषारी सर्प असून त्या पासून मानवाला कोणत्याही प्रकारची हानी होत नाही. तसेच हा साप भक्षाच्या शोधात तिकडे आला असावा असा अंदाज सर्पमित्रांनी वर्तवलाय. साप लवकरच वनविभागाच्या मार्गदर्शनाखाली निसर्ग अधिवासात सोडण्यात येईल अशी माहिती प्राणीमित्र प्रेम आहेर यांनी दिली.

कल्याण (Kalyan) परिसरात झाडी असलेल्या ठिकाणी अनेकवेळा साप (Snake) आढळल्याच्या घटना घडल्या आहेत. साप पाहून सर्वांनाच पळता भुई थोडी होते. आताही साप आल्याने रुग्णालयात ज्यांना धावता आणि पळता येत आहे ते पटकन बाजूला झाले. मात्र आजारी रुग्णांना कोणतीही हालचाल करता येत नसल्याने ते तेथेच राहिले. सुदैवाने यात कोणत्याही रुग्णाला सर्पदंश झालेला नाही.

आजवर सोशल मीडियावर सापाचे अनेक व्हिडीओ व्हायरल झाले आहेत. एका व्हिडीओमध्ये ८ फूटांचा साप थेट घराच्या छतात शिरला होता. घराच्या स्लॅबमधून हा साप खाली काढण्यात आला होता. यासह काही दिवसांपूर्वी एका व्यक्तीने आपल्या पत्नीच्या हत्येचा कट रचून तिच्या अंगावर किंग कोब्रा साप सोडल्याची घटना घडली होती. यामध्ये महिला आणि तिच्या मुलीचा सर्पदंशाने मृत्यू झाल्याचं समोर आलं होतं.