कुछ मीठा हो जाये म्हणत आपण मिठाई आणतो, वाटतो आणि खातो. गोड खाण्याची इच्छा झाली की आपण मिठाईच्या दुकानात जात आवडीची मिठाई खरेदी करून खातो. पण याच तोंड गोड करणाऱ्या मिठाईत किडे आणि अळ्या आढळले आहेत. कल्याण शहरातील एका मिठाईच्या दुकानातील मिठाईमध्ये अळ्या आणि किडे आढळले आहेत. ज्यामुळे परिसरातील नागरीकांनी संताप व्यक्त केला आहे.

कल्याण शहरात एक धक्कादायक घटना समोर आली आहे. एका मिठाईच्या दुकानातून घेतलेल्या मिठाईत किडे आढळले आहेत. मिठाईच्या दुकानातील मिठाईत किडे आढळल्यानं परिसरात एकच खळबळ उडाली आहे. या प्रकरणी संबंधित ग्राहकानं महात्मा फुले पोलीस ठाण्यात तक्रार नोंदवली आहे.

कल्याण पश्चिम परिसरात राहणाऱ्या सुनीता भगत यांनी कल्याणच्या यशवंतराव चव्हाण क्रीडांगण जवळ असलेल्या मिठाईच्या दुकानातून मिठाई खरेदी केली. ही मिठाई घरी घेऊन गेल्यानंतर त्यांनी बॉक्स उघडला. मिठाई पाहताच त्यांना धक्काच बसला. मिठाईत अळ्या आणि किडे आढळले.

या प्रकरणी भगत यांनी दुकानदाराला जाब विचारला, त्यानंतर भगत यांनी तात्काळ महात्मा फुले पोलीस ठाण्यात तक्रार दाखल केली. पोलिसांनी अन्न व औषध प्रशासनाला याची माहिती दिली आहे. अन्न व औषध प्रशासनाने या प्रकरणाची चौकशी सुरू केली आहे . दरम्यान, संबंधित मिठाईच्या दुकानावर कारवाई होणार का, याकडे नागरिकांचे लक्ष लागले आहे.